Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 413 Hüküm no: 535 Orijinal metin no: [69a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lütfi’nin hür olduğu iddiasıyla sahibesi Hatice bt. İbrahim’e açtığı davayı ispat edemediği Bâ-mühr-i hazret-i efendi Ma‘rûz Rıkka inkıyâdını mu‘terife uzun boylu çatık kaşlı kara gözlü Lütfi meclis-i şer‘-i enverde sahibe-i arzuhâl Hadîce bt. İbrahim b. Hüseyin nâm hatun tarafından husûs-ı âti’l-beyâna vekîl olduğu zât-ı mezbûretânı ârifân el-Hâc Mehmed b. Mustafa ve es-Seyyid Nu‘man b. es-Seyyid Hasan şehâdetleriyle sâbite olan Âişe bt. Abdülbaki mahzarında ben vilâyet-i İran’da medîne-i Tebriz’de iç kal‘ada sâkin hürrü’l-asl Seyfi b. Abdullah nâm kimesnenin firâşından hâsıla ve zevcesi olup hürretü’l-asl Kahraman bt. Abdullah nâm hatundan mütevellide hürre olup kat‘a bana ve ebeveynime rık târî olmamış iken müvekkile-i mezbûre bana rıkka olmak üzere vaz‘-ı yed eder sebîlim tahliye ve kasr-ı yedine tenbîh olunmak matlûbumdur deyü ba‘de’d-da‘vâ ve’s-suâl vekîl-i mezbûr[e] Âişe cevâbında müvekkilem Hadice’nin zevci olup bundan akdem vefât eden el-Hâc Mustafa b. el-Hâc İsmail hayatında târih-i i‘lâmdan iki sene mukaddem mevsûfe-i mezbûre Lütfi’yi gāib ani’l-beled Osman Reis nâm kimesneden Gürciyyetü’l-asl câriye-i memlûkesi olmak üzere üç yüz yetmiş guruş semen-i medfû‘ ve makbûza iştirâ ve kabz edip yedinde câriye-i memlûkesi iken mezbûr el-Hâc Mustafa vefât edip mevsûfe-i mezbûre müvekkilem mezbûrenin hissesine isâbet edip ber-vech-i muharrer yedinde câriye-i mevrûsesi olmak üzere vaz‘-ı yed edip ber-vech-i muharrer hürriyeti ma‘lûmu değildir deyüp mevsûfe-i mezbûre Lütfi ber-vech-i [muharrer] müdde‘âsını isbâtdan bi’l-külliye âciz olup istihlâf etmeğin müvekkile-i mezbûre Hadîce Hatun ba‘de’t-tahlîfi’ş-şer‘î mûcebiyle bilâ-beyyine müvekkile-i mezbûre Hadîce Hatun’a ke’l-evvel rakīkası olmak üzere itâ‘at ve inkıyâda mevsûfe-i mezbûre Lütfi’ye tenbîh olunduğu huzûr-ı âlîlerine i‘lâm olundu. Fî 10 min-Muharrem sene 1163