Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 414 Hüküm no: 536 Orijinal metin no: [69a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayıp mühtedi Mehmed’in kiracısı olduğu dükkânın açılıp içindeki eşyaların kayyım tayin edilen Attar Mustafa’ya emanet bırakıldıktan sonra dükkânın sahibi Hatice bt. Hacı Abdullah’a teslim edildiği Ma‘rûz Sâdır olan fermân-ı âlîye imtisâlen savb-ı şer‘-i enverden irsâl olunan Feyzullah Efendi dâ‘îleri İstanbul’da Vâlide Sultan Câmi‘-i şerîfi kurbünde Çelebioğlu mahallesinde sâkine sahibe-i arzuhâl Hadîce Hatun bt. el-Hâc Abdullah’ın menzili tahtında vâki‘ bir bâb tabîb dükkânına varıp dükkân-ı mezbûrda müşâhereten müste’ciri olup gaybet-i münkatı‘a ile gāib olan mühtedî Mehmed dükkân-ı mezkûru mukaffel bırakıp firâr eylediği civârında sâkin mazbûtü’l-esâmî Müslimîn ihbârlarıyla müte‘ayyin oldukdan sonra dükkân-ı mezkûru huzûr-ı Müslimînde feth ve derûnunda mevcûd olan yirmi sekiz kebîr boyalı kutu ve otuz sekiz dört köşeli pûta ta‘bîr olunup şişe ve kırk dokuz katremis ta‘bîr olunur şişe ve üç vakıyyelik üç vakıyye şişe ve on üç yarım vakıyyelik şişe ve on aded yüzerlik kaneviz ve yüz elli dirhem zerdeçav ve bir sagīr taş havan ve bir köhne Mısır hasırı ve bir peşkün ve bir elek ve on iki cam ma‘a çârcûbeyi ba‘de’t-tahrîr eşyâ-i muharrere-i mezbûreyi gāib-i merkūmun hâli mütebeyyin olunca emîn ve müstakīm idiği mahalle-i mezbûre ahâlîsinden Mehmed Yazıcı b. Ali ve Kahveci Ahmed Çelebi b. Mustafa ve Süleyman Beşe b. Abdullah ve Şekerci Hasan Çelebi b. Mehmed ve Na‘lıncı Mustafa Çelebi b. Mehmed ve Bayrakdâr Mehmed Beşe b. Mustafa ve Kahveci el-Hâc Hasan b. Ahmed nâm kimesneler ihbârlarıyla mütehakkık olan mezbûre Hadîce Hatun’un sadrî kebîr oğlu Attar Mustafa Çelebi b. Ahmed nâm kimesneyi kayyım nasb u ta‘yîn ve eşyâ-i mezkûreyi kayyım-ı merkūma teslîm ve dükkân-ı mezkûru tahliye ve mezbûre Hadîce Hatun’a teslîm eylediğini mezbûr dâ‘îleri mahâllinde ba‘de’t-tahrîr ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eyledikleri huzûr-ı âlîlerine i‘lâm olundu. Fî 11 Muharrem sene 1163