Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 414 Hüküm no: 537 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Kemal mahallesi ahalisinin hal ve hareketlerinden rahatsız olup mahalleden ihracını talep ettikleri Küçük Ali b. Ahmed’in uygunsuz hareketler yapmama taahhüdünde bulunmasıyla sulh oldukları Ma‘rûz Esirci Kemâl mahallesi imâmı Hâfız Mehmed Efendi b. Mehmed ve Müezzin el-Hâc Osman b. Ebûbekir ve ahâlîsinden Abdurrahman Ağa b. Mehmed ve Kasım Ağa b. el-Hâc Kasım ve el-Hâc Halil Ağa b. Hüseyin ve Mustafa Ağa b. İbrahim ve diğer Mustafa b. Ali ve Mehmed Ağa b. Mustafa ve Abdurrahman b. Abdullah nâm kimesneler meclis-i şer‘-i hatîrde derûn-ı arzuhâlde mezkûrü’l-ism olup Ayasofya-i Kebîr câbîlerinden Küçük Ali b. Ahmed nâm kimesne muvâcehesinde mezbûr Küçük Ali mahallemiz sükkânından olup kendi hâlinde olmayıp leyl ü nehâr sekrân olup herbirimize şütûm-ı galîza ile şetm edip ve menzilinde olan birkaç re’s câriyelerin gecelerde bilâ-mûceb darb-ı şedîd ile darb ettiğinden nâşî ihrâk havfı olmağın mezbûr Hacı küçük Ali <> cânibinden bir vechile emn ü rahatımız yokdur deyü bi’l-muvâcehe teşekkî ve mahalle-i mezbûreden ihrâcını iltimâs eylediklerinde mezbûr Hacı Küçük tâib ve müstağfir olup fîmâ-ba‘d kendi hâlinde olmak üzere tenbîh olundukda mezbûrûn dahi râzılar olmağın bu vechile beynleri ıslâh ve tevfîk olunup kat‘-ı nizâ‘ eyledikleri Bâb’dan <> mübâşirleri Mumcu Mehmed Beşe ile huzûr-ı âlîlerine i‘lâm olundu. Fî 13 M sene 1163