Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 415 Hüküm no: 538 Orijinal metin no: [69b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Halil’in bilezik bedelinden alacak iddiasıyla Bostanî Ali Ağa b. Mahmud’a açtığı davada sulh oldukları Ma‘rûz Derûn-ı arzuhâlde mezkûreti’l-ism olup zâtı Nu‘man b. el-Hâc Süleyman ve es-Seyyid el-Hâc Mehmed Ağa b. İbrahim ta‘rîfleriyle mu‘arrefe olan Fâtıma bt. Halil nâm hatun meclis-i şer‘de sadrî kebîr oğlu Mustafa ve sadriye kebîre kızı Âişe veledey Ömer hazır oldukları hâlde sahib-i arzuhâl Bostânî Ali Ağa b. Mahmud muvâcehesinde mezbûr Bostânî Ali Ağa zimmetinde bâ-temessük bir çift altın bilezik kıymetinden yüz on guruş ve nakid otuz guruş ki cem‘an yüz kırk guruş hakkım vardır deyü taleb ve da‘vâya tesâddî eylediğimde ol dahi cevâbında cihet-i karzdan ancak sana yirmi yedi guruş deynim olup meblağ-ı mezbûr yirmi yedi guruşu dahi sana tamamen edâ ve teslîm etmişidim deyü ba‘de vukū‘ı’l-münâza‘a bâ-vesâtet-i muslihîn ben mezbûr Bostânî Ali Ağa ile on sekiz guruş bedel-i makbûza sulh olup mâ‘adâ müdde‘âm olan meblağa müte‘allika âmme-i da‘vâdan mezbûr Bostânî Ali Ağa’nın zimmetini ibrâ ve ıskāt eyledim deyü olan ikrârını mezbûr Bostânî Ali Ağa dahi tasdîk eylediği bi’t-terâzî Mahkeme-i Bâb’dan mübâşirleri Kapıkethudâsı Hâfız Osman Beşe kulları iltimâsıyla huzûr-ı âlîlerine i‘lâm olundu. Fî 13 Muharrem sene 1163