Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 75 Hüküm no: 42 Orijinal metin no: [10b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amasya’da Hundî Hatun Vakfı’nın nısf tevliyetinin Seyyid Mehmed Ragıb Efendi’ye tevcihi Ma‘rûz, Amasya kazâsında vâki‘ Paşa evlâdı mülhakātından Hundî Hatun Vakfı’nın evlâdiyet ve meşrûtiyet üzere humus mahsûl vazîfe ile tevliyeti es-Seyyid Mehmed Rağıb ve es-Seyyid Mehmed Emin ibney es-Seyyid Mehmed nâm karındaşların üzerlerinde olduğu askerî rûznâmçesinden derkenâr olunmağla iktizâsı i‘lâm olunmak bâbında sâdır olan fermân-ı âlîşâna imtisâlen medîne-i Üsküdar’da Atîk Vâlide mahallesi imâmı es-Seyyid Hâfız Hasan Efendi b. Mehmed ve ahâlîsinden es-Seyyid Ömer Şevki Efendi b. Ali nâm kimesneler meclis-i şer‘a celb ile keyfiyeti gereği gibi etrâfıyla suâl olundukda mezbûr es-Seyyid Mehmed Emin mahalle-i mezbûrede sâkin iken bundan akdem bilâ-veled fevt olduğunu ve sahib-i arzuhâl merkūm es-Seyyid Mehmed Rağıb Efendi derkenâr dahi musaddak olduğu vech üzere li-ebeveyn er karındaşı ve tevliyet-i mezkûrenin hasran meşrûtun-lehi olup bundan gayri müstahıkk-ı âharı olduğu ma‘lûmları olmadığını herbiri alâ-tarîkı’ş-şehâde ihbâr etmeleriyle bu sûretde umûr-ı vakf-ı şerîfi sadâkat ve istikāmet üzere rü’yet eylemek ve beher sene muhâsebesi mahâllinde ma‘rifet-i şer‘le rü’yet olunmak şartıyla nısf tevliyet-i mezkûre dahi birâderi müteveffâ-yı merkūmun bilâ-veled mahlûlünden sahib-i arzuhâl merkūm es-Seyyid Mehmed Rağıb Efendi’nin hissesine ilhâk olunmak bâbında emr [ü] fermân hazret-i veliyyü’l-emrindir. Fî 14 R sene [1]248