Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 418 Hüküm no: 544 Orijinal metin no: [70a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahıskalı Ahmed Bey kızı Pakize Hanım’ın babasının terekesinden Mehmed Bey b. Ahmed’deki alacağını taksitler halinde almak üzere anlaştığı Bâ-mühr-i hazret-i efendi Ma‘rûz Vilâyet-i Anadolu’da Ahıska eyâletinde Mamran sancağında Tebkir kasabası ahâlîsinden iken bundan akdem vefât eden el-Hâc Ahmed Bey b. Osman Bey b. Hasan Paşa’nın sulbiye kebîre kızı ve hasran vârisi olduğu lede’ş-şer‘i’l-enver zâhir olup zâtı el-Hâc Hüseyin ve Ömer Efendi ta‘rîfleriyle mu‘arrefe olan sahibe-i arzuhâl Pakize Hanım meclis-i şer‘de derûn-ı arzuhâlde mezkûrü’l-ism Mehmed Bey b. Ahmed mahzarında bundan akdem babam mezbûr fevt oldukda Ahıska vâlîsi olan Yusuf Paşa tarafından mezbûr Mehmed Bey mübâşeret ile babam müteveffâ-yı mezbûrun terekesini tahrîr için kasaba-i mezbûreye gelip mezbûr Mehmed Bey babam müteveffâ-yı mezbûrun terekesinden üç yüz guruş kıymetli bir cılkafa kürk ve üç yüz guruş kıymetli bir altın basma sâ‘at ve dokuz fındık altını ve iki bin guruşluk ak akçe ile kendi malım olan mecmû‘ dört yüz guruş kıymetli on sekiz re’s kısrağımı mezbûr Mehmed Bey bi-gayr-ı hakkın ahz ve istihlâk etmekle mezbûr Mehmed Bey’den istirdâd sadedinde olduğumda ol dahi inkâr edip beynimizde bu vechile ba‘de vukū‘ı’l-münâza‘a tavassut-ı muslihûn ile da‘vâ-yı mezkûremden mezbûr Mehmed Bey ile beş yüz guruş bedel üzerine sulh olup bedel-i mezkûrdan iki yüz elli guruşunu hâlâ ba‘de’l-ahz mâ‘adâsı olan iki yüz elli guruşunu dahi târih-i i‘lâmdan altı ay tamamınadek edâya mezbûr Mehmed Bey’i tecîl eylediğimde ol dahi ber-vech-i muharrer müeccelen edâya ta‘ahhüd eyledi fîmâ-ba‘d babam müteveffâ-yı mezbûr el-Hâc Ahmed Bey’in terekesine ve târih-i i‘lâma gelince sâir beynimizde cereyân eden hukūk-ı ma‘lûme ve mechûleye müte‘allika âmme-i da‘vâdan mezbûr Mehmed Bey’in zimmetini ibrâ-i âmm-ı râfi‘u’l-hısâm ile ibrâ ve ıskāt eyledim dediğini mezbûr Mehmed Bey dahi tasdîk edip bu vechile kat‘-ı nizâ‘ eyledikleri huzûr-ı âlîlerine i‘lâm olundu. Fî 10 Muharrem sene 1163