Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 419 Hüküm no: 545 Orijinal metin no: [70a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habbaz Kalo v. Yuvan’ın, fırın aletlerindeki hisselerini sattığı Artin v. Agop’un hisseleri tekrar Kalo’ya satıp bedelini taksitler halinde tahsil etmek üzere anlaştıkları Bâ-mühr-i hazret-i efendi Ma‘rûz Habbâz tâifesinden Kalo v. Yuvan meclis-i şer‘de Artin v. Agop nâm zimmî muvâcehesinde zevcesi Zenbele bt. Gori hâzıra olduğu hâlde bundan akdem İstanbul’da Davud Paşa Mahkemesi tahtında olan habbâz fırınında mevcûd gedik ta‘bîr olunan eşyâ-i ma‘lûme ve âlât-ı mu‘ayyenenin nısf-ı şâyi‘i benim yedimde mülküm iken işbu mesfûr Artin’e iki yüz otuz guruş semen-i makbûza bey‘ ve teslîm etmişidim ba‘dehû eşyâ-i mezkûrenin nısfı benim ve nısf-ı âharı zevcem işbu Zenbele Nasrâniye’nin mülküdür ve bey‘ etmeyip irhân etmişidik deyü mersûm Artin’den da‘vâ sadedinde olmuşidim el-hâletü hâzihî da‘vâ-yı mezkûrumdan ferâgat edip eşyâ-i mezkûreyi mukaddemâ eylediğim bey‘ sahîhdir ve semeni olan iki yüz otuz guruş makbûzumdur ve eylediğim irhân da‘vâsını kâziben ettim deyüp ve zevcesi mezbûre Zenbele Nasrâniye dahi rub‘u benim mülkümdür deyü eylediğim da‘vâyı kâziben ettim benim gedik i‘tibâr olunan eşyâ-i mezbûrede kat‘a alâka ve medhalim yokdur deyüp ber-minvâl-i muharrer ikrâr ve i‘tirâfları tescîl olundukdan sonra mesfûr Artin v. Agop mesfûr Kalo v. Yuvan muvâcehesinde ber-minvâl-i muharrer Kalo zimmîden iki yüz otuz guruş semen-i medfû‘a iştirâ ve kabz eylediğim nısf gedik ta‘bîr olunur eşyâ ve âlât-ı ma‘lûmenin nısf-ı şâyi‘ini <> safka-i vâhide ile işbu mesfûr Kalo zimmîye tarafeynden îcâb ve kabûlü hâvî [70b] bey‘-ı kat‘î-i şer‘î ile yüz elli guruşa bey‘ ve teslîm ve temlîk ol dahi ber-minvâl-i muharrer iştirâ ve tesellüm ettikden sonra semen[i] olan meblağ-ı mezkûr yüz elli guruşu târih-i i‘lâmdan her ay tamamında beş guruş vermek üzere otuz ay tamamına değin mukāssaten edâda mesfûr Kalo zimmîyi tecîl eyledim dediğini mesfûr Kalo zimmî dahi tasdîk eylediği ba‘de’t-tescîl bu vechile kat‘-ı nizâ‘ eyledikleri huzûr-ı âlîlerine i‘lâm olundu bâkī fermân hazret-i veliyyü’l-emrindir. Fî 13 Muharrem sene 1163