Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 420 Hüküm no: 546 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hasan’ın, Hanife Hanım bt. Kara Hasan Paşa’ya sattığı cariyesi Zeyneb’in çaldığı parayı elinde bulunduran Hatem bt. Ahmed’e açtığı davada sulh oldukları Ma‘rûz İstanbul’da İshak Paşa mahallesi sâkinelerinden sahibe-i arzuhâl Zeyneb câriyenin mukaddemâ sahibesi olan Âişe bt. Hasan b. Abdullah nâm hatun tarafından husûs-ı âti’l-beyânı ikrâra vekîl-i sâbitü’l-vekâlesi el-Hâc Ali Ağa b. el-Hâc Mustafa meclis-i şer‘de zâtı ta‘rîf-i şer‘î ile mu‘arrefe olan derûn-ı arzuhâlde mezkûreti’l-ism Hatem bt. Ahmed nâm hatun mahzarında câriye-i mezbûre Zeyneb’in hâlâ sahibesi olan Hanife Hanım bt. Kara Hasan Paşa tarafından sâbitü’l-vekâle vekîli olan Fâtıma bt. Abdullah nâm hatun ile câriye-i merkūme Zeyneb hâzıra oldukları hâlde müvekkilem mezbûre Âişe târih-i i‘lâmdan iki sene mukaddem câriye-i mezbûre Zeyneb yedimde câriye-i memlûkem iken malımdan dört yüz elli guruşumu sirka edip Sarımsakcı Ali nâm kimesnenin menzilinde mezbûre Hatem Hatun’a def‘ ve teslîm ol dahi yedinden ahz u kabz etmekle hâlâ meblağ-ı mezbûr dört yüz elli guruşu mezbûre Hatem Hatun’dan taleb ve da‘vâ sadedinde olduğumda ol dahi ba‘de’l-inkâr ve’l-münâza‘a bâ-vesâtet-i muslihîn da‘vâ-yı mezkûremden mezbûre Hanım ile iki yüz yirmi beş guruş bedel-i makbûza sulh olup meblağ-ı mezbûrun mâ‘adâsına müte‘allika âmme-i da‘vâdan mezbûre Hatem’in zimmetini ibrâ-i âmm-ı râfi‘u’l-hısâm ile ibrâ ve ıskāt eyledim dedi deyü bi’l-vekâle olan ikrârını mezbûre Hatem Hatun tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî 15 Muharrem sene 1163