Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 420 Hüküm no: 547 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Mustafa’nın, varisi olduğu amcası İbrahim’in Kostantin v. Yani’de olacağı olduğu iddiasıyla açtığı davada haksız bulunduğu Bâ-mühr-i hazret-i efendi Ma‘rûz Sahib-i arzuhâl Mehmed b. Mustafa dîvân-ı âlîlerinde ma‘kūd meclis-i şer‘de Kostantin v. Yani nâm zimmî ile terâfu‘larında ammim olup bundan akdem fevt olan İbrahim hayatında yedinde mülkü olan bir sîm bıçak ve kırk zer-i mahbûb altınını dokuz sene mukaddem işbu mesfûr Kostantin’e bi-tarîkı’l-emâne teslîm edip kable’l-ahz fevt ve verâseti bana münhasıra olmağla bıçak-ı merkūm ile kırk aded zer-i mahbûb altınını bi’l-verâse taleb ederim deyü ba‘de’d-da‘vâ ve’s-suâl mesfûr Kostantin husûs-ı merkūmu bi’l-külliye inkârından mâ‘adâ mezbûr Mehmed işbu târih-i i‘lâm şehrinin beşinci günü Ebî Eyyûb-i Ensârî’de nâibü’ş-şer‘ olan müderrisîn-i kirâmdan Evliyâzâde Ahmed Efendi huzûrunda husûs-ı mezkûru benden ba‘de’d-da‘vâ ve’l-münâza‘âti’l-kesîre da‘vâ-yı mezkûresinden tavassut-ı muslihûn ile benimle an-inkâr otuz guruş bedel-i makbûza sulh olup husûs-ı mezkûra müte‘allika âmme-i da‘vâdan zimmetimi ibrâ-i âm ile ibrâ ve ıskāt eyledi deyü min-külli’l-vücûh takrîrine mutâbık mûmâ-ileyhin imzâsıyla mümzât ve hâtemi ile mahtûm bir kıt‘a hüccet-i şer‘iye ibrâz ile ba‘de’d-def‘ ve’s-suâl mezbûr Mehmed hüccet-i mezkûrenin mazmûnunu ikrâr ve i‘tirâf etmeğin mûcebince mezbûr Mehmed mesfûr Kostantin’e bî-vech mu‘ârazadan men‘ olunduğu huzûr-ı âlîlerine i‘lâm olundu bâkī fermân men-lehu’l-emrindir. Fî 15 Muharrem sene 1163