Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 75 Hüküm no: 43 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gölpazar-ı Bursa kazasındaki Karatomaklı mezraasında Ahmed Halîfe’nin mi yoksa Mehmed Şâkir Efendi’nin mi hak sahibi olduğuna mahkemede karar verilmesi Sâdır olan fermân-ı âlîlerine imtisâlen işbu arzuhâl ve arz-ı i‘lâm ve derkenârlara ve merbût olan fetvâ-yı şerîfeye nazar olundukda Gölpazar-ı Bursa kazâsında Künbed karyesinde vâki‘ Karatomaklı mezrâ‘asının bâ-berât-ı âlî mutasarrıfı olan es-Seyyid eş-Şeyh Hâfız Abdürreşid’in ferâğından sulbî oğlu es-Seyyid Ahmed iki yüz yirmi altı senesi Zilka‘de’sinde tevcîh olunup ba‘dehû mezbûr es-Seyyid Ahmed’in bilâ-veled fevtinden kırk altı senesi Rebî‘ülâhiri’nde müderrisîn-i kirâmdan Mehmed Şâkir Efendi’ye tevcîh olunup el-yevm üzerinde olduğu askerî rûznâmçesinden ve yine Gölpazar-ı Bursa kazâsında tâbi‘ Künbed karyesinde vâki‘ Karatomaklı Mezrâ‘ası Vakfı’nın yevmî bir akçe vazîfe ile ve Akpınar kurbünde Susuz karyesinde kâin Sarnıç Mezrâ‘ası Vakfı’nın vazîfe-i mu‘ayyene ile mezrâ‘adârlıklarına mutasarrıf olan es-Seyyid Hâfız Abdürreşid fevti mahlûlünden kırk altı senesi Rebî‘ülevveli’nde es-Seyyid İbrahim Halîfe’ye tevcîh olunup ba‘dehû mezbûr es-Seyyid İbrahim Halîfe’nin kasr-ı yedinden kırk yedi senesi Zilhicce’sinde Hadimizâde es-Seyyid el-Hâc Ahmed Halîfe’ye tevcîh olunduğu Anadolu Muhâsebesi’nden derkenâr olunmuş mezbûr es-Seyyid el-Hâc Ahmed Halîfe’nin Südde-i sa‘âdete takdîm eylediği işbu arzuhâl mefhûmunda mezrâ‘a-i mezkûreye mezbûr Mehmed Şâkir Efendi’nin berat alması kendüye gadri mûcib olduğundan bahisle aldığı berat kaydı terkīn olunmasını istid‘â etmiş olup lâkin taraf-ı bâhirü’ş-şeref-i hazret-i şeyhülislâm ve müfti’l-enâm-ı âlî-makām hasenetü’l- eyyâm sellemehullâhü’l-melikü’l-azîzü’l-allâm lâ-zâle bâbü fetvâhu meftûhan ilâ-yevmi’l-kıyâmdan i‘tâ buyrulan fetvâ-yı şerîfede, bir zâviye Zeyd’in fevtinden mâliye beratıyla Amr’a tevcîh olundukdan sonra ol zâviye yine Zeyd’in fevtinden askerî beratıyla Bekir’e dahi tevcîh olunup lâkin Amr’ın ref‘inden ta‘arruz olunması berat-ı pâdişâhîde mâliye askerî beratı mukaddem târih olup ref‘ine ta‘arruz olunmadıkça mukaddem ile amel olunmak lâzım olur deyü iftâ buyurulmağın bu sûretde sâlifü’z-zikr Sarnıç mezrâ‘ası’nda münâza‘a olmayıp ancak münâza‘un fîh olan Karatomaklı mezrâ‘ası mezbûr Abdürreşid’in kasr-ı yedinden oğlu es-Seyyid Ahmed’e yirmi altı senesi tevcîh sebkat etmiş ve yine mezbûr Abdürreşid’in mahlûlünden es-Seyyid İbrahim kırk altı senesi tevcîh sebkat etmiş olup ol vechile mukaddem târih ile tevcîh olunan mezbûr es-Seyyid Ahmed’in ref‘ine ta‘arruz olunmayarak mezbûr İbrahim Halîfe’ye muahharan tevcîhi fetvâ-yı şerîfe mazmûnuna münâfî idiği ve zahr-ı arzuhâlde muharrer Anadolu Muhâsebesi kuyûd-ı atîkasında ve ahd-i karîbe dek askerîden yürümüş ve hatta mezbûr Mehmed Şâkir Efendi’ye taraf-ı Sadâret-i Anadolu’dan tevcîh olunmayıp sarâhaten emr-i âlî sudûruyla tevcîh olunmuş olduğu ve hâlbuki mezbûr Mehmed Şâkir Halîfe’ye kırk altı senesi ve mezbûr el-Hâc Ahmed Halîfe’ye kırk yedi senesi tevcîh olunmuş olup ol vechile işbu tevcîh dahi mukaddem târihle sebkat eylediğine nazaran ref‘ine sebeb-i şer‘î bulunamadığı derkâr ise de tarafeyn Âsitâne-i aliyyede mevcûd oldukları ihbâr olunmuş olmağla tarafeyn huzûr-ı şer‘de bi’l-muvâcehe ber-nehc-i şer‘î mürâfa‘a olunup zımnında ne vechile hükm-i şer‘î lâhık olur ise ona göre iktizâsına bakılmak emr-i savâb idiği ma‘lûm-ı devletleri buyruldukda ber-vech-i muharrer terâfu‘-i şer‘-i şerîf olunmak bâbında fermân-ı âlîşân sudûru iktizâ eylediği huzûr-ı âlîlerine i‘lâm olundu. Fî 14 Ca sene [1]248