Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 424 Hüküm no: 554 Orijinal metin no: [71b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abraham v. Toros’a borcu olan Mardisor v. Şirdan’ın borcunu ödemesine yapılan tenbih Ma‘rûz Derûn-ı arzuhâlde mezkûr Abraham v. Toros nâm zimmî meclis-i şer‘-i hatîrde sahib-i arzuhâl Mardiros v. Şirdan nâm zimmî muvâcehesinde târih-i i‘lâmdan dokuz sene mukaddem Belgrad karşısında zemîn-i odasında cihet-i karzdan iki yüz beş guruş kırk akçe olmak üzere elli altı Macar altını vermişidim hatta İstanbul’a geldiğimizde Elçi Hanı’nda şuhûd muvâcehesinde ikrâr ve işhâd dahi ettiğinden sonra meblağ-ı mezkûrun yüz kırk iki guruşunu mesfûr yedinden ba‘de’l-kabz bâkī altmış üç guruş kırk akçe hakkımı mesfûr Mardiros’dan taleb ederim deyü ba‘de’d-da‘vâ ve’s-suâl ol dahi cevâbında meblağ-ı mezkûru inkâr eylediğinden mâ‘adâ kabzını mu‘terif olduğu meblağ-ı mezkûrdan ziyâde doksan üç guruşumu dahi bi-gayr-ı hakkın ahz etmişidi deyü eylediği def‘ini mesfûr Mardiros beyâna kādir olmayıp bi’t-taleb müdde‘î-i mezbûr ba‘de’t-tahlîfi’ş-şer‘î müdde‘î-i mezbûr Abraham ber-vech-i muharrer müdde‘âsını lede’t-tezkiye adâletleri zâhir olan Süleyman b. Mustafa nâm kimesne ile Saka Hans v. Toros nâm zimmî şehâdetleriyle mesfûr Mardiros muvâcehesinde vech-i şer‘î üzere isbât etmeğin mûcebince meblağ-ı bâkī-i mezkûr altmış üç guruş kırk akçeyi müdde‘î-i merkūm Abraham zimmîye edâ ve teslîme mesfûr Mardiros zimmîye tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 19 Muharrem sene 1163