Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 425 Hüküm no: 557 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. İbrahim’in Nefise bt. Abdullah’da bazı eşyaları olduğu iddiasıyla açtığı davayı ispat edemediği Ma‘rûz Kapıkethudâsı Mustafa Beşe mübâşeretiyle Bâb Mahkemesi’ne ihzâr olunan Nefise bt. Abdullah nâm hatunun hasmı ve zâtı ta‘rîf-i şer‘î ile mu‘arrefe olan Âişe bt. İbrahim nâm hatun meclis-i şer‘-i enverde yine zâtı ta‘rîf-i şer‘î ile mu‘arrefe olan mezbûre Nefise Hatun muvâcehesinde mezbûre Nefise Hatun târih-i i‘lâmdan beş ay mukaddem malımdan beynimizde kıymeti ma‘lûme bir kaneviz ferâce ve bir lâciverdî hâre cebe ve bir gömleklik bürüncük bezimi sana bey‘ edivereyim deyü yedimden ahz u kabz etmişidi eşyâ-i muharrere-i mezkûrenin aynıları mevcûde ise aynılarını müstehleke ise ba‘de’s-sübût kıymet-i şer‘iyelerini mezbûre Nefise’den taleb ederim deyü ba‘de’d-da‘vâ ve’l-inkâr müdde‘iye-i mezbûre Âişe ber-vech-i muharrer müdde‘âsını beyâna kādire olamayıp talebiyle mezbûre Nefise Hatun’a vech-i şer‘î üzere yemîn verilmeğin mûcebiyle müdde‘iye-i mezbûre Âişe Hatun bilâ-beyyine-i âdile mezbûre Nefise Hatun’a bî-vech-i şer‘î mu‘ârazadan men‘ olunduğu mübâşir-i mezbûr iltimâsıyla huzûr-ı âlîlerine i‘lâm olundu. Fî 20 Muharrem sene 1163