Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 426 Hüküm no: 558 Orijinal metin no: [72a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakub b. Mustafa’nın nikahlı karısı olduğu iddiasıyla Hatice bt. Hüseyin’e açtığı davayı ispat edemediği Ma‘rûz Derûn-ı arzuhâlde mezkûrü’l-ism Yakub b. Mustafa meclis-i şer‘de sahibe-i arzuhâl Emetullah Hatun’un kebîre kızı olup zâtı ta‘rîf-i şer‘î ile mu‘arrefe olan Hadîce bt. Hüseyin nâm hatun mahzarında târih-i i‘lâmdan sekiz gün mukaddem İstanbul’da Ereğli mahallesinde vâki‘ sâkin olduğum menzilimde mezbûre Hadîce Hatun şâhidîn mahzarlarında işbu hazır bi’l-meclis Osman Efendi’yi tarafından zikri câ’î akde vekîl nasb u ta‘yîn eylediğinden sonra mezbûr Osman Efendi dahi dört bin akçe mehr-i müeccel tesmiyesiyle mezbûre Hadîce Hatun’un nefsini bi’l-vekâle bana akd ve tezvîc ben dahi ber-vech-i muharrer tezevvüc ve kabûl etmemle hâlâ mezbûre Hadîce Hatun nefsini bana teslîmden imtinâ‘ eder deyü ba‘de’d-da‘vâ ve’s-suâl mezbûre Hadîce Hatun mezbûr Osman Efendi’yi ber-vech-i meşrûh tarafından vekîl eylediğini ve akd-i mezkûru bi’l-külliye inkâr edicek müdde‘î-i merkūm Yakub ber-vech-i mübeyyin müdde‘âsını beyân için ikāmet eylediği iki nefer kimesne mezbûre Hadice’nin zâtı ma‘lûmumuz değildir deyü edâ-i şehâdet edemeyip merkūm Yakub müdde‘âsını beyândan ızhâr-ı aczile istihlâf etmeğin mezbûre Hadîce Hatun bi’t-taleb ba‘de’t-tahlîfi’ş-şer‘î mûcebiyle müdde‘î-i merkūm Yakub bî-vech mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 21 min-Muharrem sene 1163