Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 426 Hüküm no: 559 Orijinal metin no: [72a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryem bt. Şahbaz’ın, çeşitli eşyalarını satmak için verdiği Mihal’in eşya bedellerini ödemesine yapılan tenbih Ma‘rûz Şahsı ta‘rîf-i şer‘î ile mu‘arrefe olan sahibe-i arzuhâl Maryem bt. Şahbaz nâm hatun meclis-i şer‘-i hatîrde arzuhâlde mezkûrü’l-ism Mihal [v.] Bağram nâm zimmî ile terâfu‘larında mesfûre Maryem Nasrâniye târih-i i‘lâmdan bir sene mukaddem Bezzâzistân-ı Cedîd kapısı önünde Mihal zimmîye kırk guruş kıymetli bir çift zümrüd habbe küpe ile kırk guruş kıymetli bir top siyah zerbâb kumaşımı bey‘ etmek için vermişidim hâlâ yedinde kalmağla mevcûde ise aynılarını müstehleke ise ba‘de’s-sübût kıymet-i şer‘iyelerini mesfûr Mihal zimmîden taleb ederim deyü olan da‘vâsında mesfûr Mihal zimmî istintâk olundukda müdde‘iye-i mesfûrenin mârrü’z-zikr zümrüd küpesini yirmi guruşa âhara bey‘ ve semenini ahzını ve bir top zerbâb kumaşı târih-i mezkûrda sûk-ı sultânîde ba‘de’l-müzâyede on yedi guruşa çıkıp yedinde aynı mevcûde olmayıp dâinlerinden bir zimmî yedinden ahz ve istihlâk eylediğini mesfûr Mihal zimmî ikrâr ve i‘tirâf etmeğin mûcebiyle meblağ-ı mezbûr yirmi guruş ile mârrü’z-zikr bir top siyah zerbâb kumaşın kıymeti olan yedi guruşu alâ-mûceb-i ikrârihî bi-tarîkı’d-damân müdde‘iye-i mesfûreye edâya mesfûr Mihal zimmîye ba‘de’t-tenbîh mesfûr Maryem Nasrâniye zerbâbın ziyâde kıymeti olan yirmi üç guruşu ve küpe semeninden yirmi guruş ziyâde ahzını beyâna havâle olunduğu Mahkeme-i Bâb’dan huzûr-ı âlîlerine i‘lâm olundu emr ü fermân zi’l-emr hazretlerinindir. Fî 22 Muharrem sene 1163