Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 427 Hüküm no: 560 Orijinal metin no: [72a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Hasan’ın, boşandığı hanımı Rabia bt. Abdullah’da olan alacak davasında sulh olduğu Ma‘rûz Sahib-i arzuhâl Mustafa b. Hasan nâm kimesne meclis-i şer‘-i hatîrde derûn-ı arzuhâlde mezkûrü’l-ism olup zâtı ta‘rîf-i şer‘î ile mu‘arrefe olan Râbia bt. Abdullah nâm hatun muvâcehesinde zevc-i sâbıkı Mahmud b. İsmail nâm kimesne hazır olduğu hâlde taraf-ı şer‘-i enverden yedlerine i‘tâ olunan sulh hüccetinde tafsîl ve beyân olunduğu vech üzere mezbûr Mustafa târih-i i‘lâmdan sekiz ay mukaddem sadr-ı sâbık devletlü Mehmed Paşa hazretlerinin Kıztaşı kurbünde vâki‘ saraylarında mezbûre Râbia Hatun’a karz yüz bir guruş vermişidim meblağ-ı merkūm hâlâ yedinde kalmağla meblağ-ı merkūm yüz bir guruşu mezbûre Râbia Hatun’dan taleb ederim deyü tesâddî eylediği da‘vâsından bâ-vesâtet-i muslihîn mezbûre Râbia Hatun ile an-inkâr on bir guruş bedel-i makbûza sulh olup mâ‘adâ doksan guruşa ve târih-i i‘lâma gelince sâire müte‘allika âmme-i de‘âvî ve kâffe-i mutâlebâtdan mezbûre Râbia Hatun’un zimmetini ibrâ ve ıskāt eylediği yüz otuz yedi guruş da‘vâsından meccânen fâriğa olup meblağ-ı müdde‘â-bih yüz otuz yedi guruşa ve bedel-i sulh deyü medfû‘u olan meblağ-ı mezkûr on bir guruşa ve târih-i i‘lâma gelince sâire müte‘allika âmme-i de‘âvî ve kâffe-i mutâlebâtdan mezbûr Mustafa’nın ve zevc-i sâbık hâzır-ı merkūm Mahmud’un zimmetlerini ibrâ ve ıskāt eyleyip herbiri vech-i muharrer üzere âharın ibrâsını kabûl eyledikleri Mahkeme-i Bâb’da tescîl ve huzûr-ı âlîlerine i‘lâm olundu el-emrü li-men-lehu’l-emr. Fî 23 Muharremi’l-harâm sene 1163