Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 79 Hüküm no: 76 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Fermaho’nun varislerine intikal eden bağın Nikoli zimmiye satıldığı Medîne-i Üsküdar’a muzâfe Adalar nâhiyesine tâbi‘ Maldepe karyesinde mütemekkine iken bundan akdem hâlike olan Fermaho bt. Aci Manol Nasrâniyenin verese-i münhasırasından sadrî kebîr oğlu Kostandi ve kebîre kızı Domine taraflarından ber-vech-i âti’l-beyanda vekîlleri olduğu Manolaki Dimitri ve Şişman Andon v. Yani zimmîler şehâdetleriyle vekâleti sâbit olan yine sadrî kebîr oğlu kendü nefsinden asıl ve sagīr oğlu Yorgi ve sagīre kızı Frosni taraflarından bâ-hüccet-i şer‘iye vasiyyeleri [vasîleri] olan Hürmüz v. Eksori zimmî meclis-i şer‘-i hatîr-i lâzimü’t-tevkīrde işbu râfi‘ü’r-rakīm Nikola v. Lambernoz zimmî muvâcehesinde vekâleten ve asâleten ve vesâyeten ikrâr ve takrîr-i kelâm edüp karye-i mezbûre toprağında Uluyol üstünde vâki‘ bir tarafı merkūm Nikoli bağı ve bir tarafı Suyabatmaz Anaştaş bağı ve bir tarafı Ligori veresesi bağı ve bir tarafı tarîk-i âm ile mahdûd tahmînen dört dönüm kürûmî mülk bir kıt‘a yerli bağı hâlike-i mesfûrenin mülkü ve ba‘de’l-helâkihi bana ve müvekkilân-ı mesfûrâna ve vasiyyeleri olduğum sagīrân-ı mersûmâna sekiz sehim i‘tibârıyla iki sehmi bana ve ikişer sehmi merkūmân Kostandi ve Yorgi’ye ve birer sehmi mesfûretân Domine ve Frosni’ye isâbet etmişidi el-hâletü hâzihi bağ-ı mahdûd-ı mezkûrun hâsılı sarfına vefâ etmemekle ben ve müvekkilân kendü hisselerimizi merkūm Nikoli zimmîye bey‘ murâd etmekle sagīrân-ı merkūmânın hisseleri dahi ma‘an bey‘ olunup semeninin nemâsıyla infâk ve iksâ olunmak haklarında enfa‘ olmağla bi’l-izni’ş-şer‘î tarafeynden îcâb ve kabûlü hâvî bey‘-i bâtt-ı sahîh-i şer‘î ile asâleten ve vekâleten ve vesâyeten yetmiş guruşa merkūm Nikoli zimmîye bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabûl edüp semen-i mezkûr yetmiş guruşu yedinden asâleten ve vekâleten ve vesâyeten tamâmen ahz ü kabz eyleyüp ba‘de’l-yevm bağ-ı mahdûd-ı mezkûrda benim ve gerek müvekkilân ve gerek sagīrân-ı mezbûrânın kat‘â ve kātıbeten alâka ve medhalimiz kalmayup müşterî-i merkūm Nikoli zimmînin mülk-i müşterâsı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’t-tâsi‘ ve’l-ışrîn min-şehri Muharremü’l-haram li-sene semânîn ve mi’ete ve elf. Şuhûdü’l-hâl: Molla Ali b. Mehmed, Konevî Abdullah Beşe, Küçük Süleyman Beşe, es-Seyyid Ahmed Beşe, es-Seyyid Hasan Beşe, Kürt İbrahim Beşe, Ahmed Efendi. Todoraki v. Fores, Serafil v. Nikola, Garofalo v. Küplü Burunsuz Yani, Anaştaş v. Yorgi.