Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 428 Hüküm no: 561 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hacı Osman’ın, geçinemediği kocası Mehmed Çelebi b. Mustafa’dan muhâlaa yoluyla boşandığı Sehven kaydolunup yine hüccet sicilline kaydolundu Mahmiye-i İstanbul’da Hatuniye mahallesi sâkinelerinden Âişe bt. el-Hâc Osman b. Abdullah nâm hatunun kız karındaşı oğlu ve tarafından hul‘-ı âti’z-zikri ikrâra vekîl olduğu zât-ı mezbûreyi ârifân Salih Çelebi b. Süleyman ve es-Seyyid Mustafa Çelebi b. Hasan nâm kimesneler şehâdetleriyle sâbit olan Mehmed Çelebi b. Mustafa meclis-i şer‘-i hatîr-i lâzımü’t-tevkīrde müvekkile-i mezbûre Âişe’nin zevc-i dâhili işbu bâ‘isü’l-kitâb Mehmed Beşe b. Mustafa mahzarında bi’l-vekâle ikrâr ve takrîr-i kelâm edip müvekkilem mezbûre Âişe Hatun mezbûr Mehmed Beşe zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh olan yedi bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mehmed Beşe ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve târih-i kitâba gelince sâir beynimizde cereyân eden hukūk-ı ma‘lûme ve mechûleye müte‘allika âmme-i da‘vâdan herbirimiz âharın zimmetini ibrâ-i âmm-ı râfi‘u’l-hısâm ile ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-işrîn min-Muharremi’l-harâm li-sene selâse ve sittîn ve miete ve elf. Şuhûdü’l-hâl: Salih Çelebi b. Süleyman, Arabzâde Hacı Mustafa, es-Seyyid Mustafa Çelebi b. Hasan, es-Seyyid Osman b. Hasan, es-Seyyid Mehmed Çelebi b. Bayram, es-Seyyid Ali Çelebi b. Mustafa, Abdi Çelebi b. Ahmed