Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 428 Hüküm no: 562 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kigork v. Serkiz, Serkiz v. Ermiya ve Manasfan v. Agop adlı Ermenilerin Rum mahallelerinden aldıkları evlere ait vergilerini Rumlarla beraber ödemelerine yapılan tenbih Bâ-mühr-i hazret-i efendi Ma‘rûz-ı dâ‘î-i devletleridir ki Mahmiye-i İstanbul’da Mirâhur mahallesinde vâki‘ Kostantin Kilisesi cemâ‘atleri olan Rûmiyân tâifelerinin cemâ‘atbaşıları vekîlleri Dimitri v. İlya ve Hristo v. Rali ve Zafiri v. Nikola ve Menahim v. Todori nâm zimmîler meclis-i şer‘de Koca Mustafa Paşa mahallesinde vâki‘ Sulu Manastır Kilisesi cemâ‘atleri olan Ermeni tâifesinin kezâlik cemâ‘atbaşıları Kigork v. Serkiz ve Serkiz v. Ermiya ve Manasfan v. Agop nâm zimmîler muvâcehelerinde işbu yedimizde olan emr-i âlîşân mûcebince tahrîr-i atîk ve cedîdde Rûmiyân yedlerinde bulunan emlâke altmış sekiz ve bir sülüs avârızhânesi vaz‘ ve Tersâne-i âmire ocaklığı kaydolup ba‘dehû emlâk-ı mezkûreden ma‘lûmü’l-aded menâzili Ermeni tâifesi iştirâ ve temellük etmeleriyle hisselerine isâbet edeni bizim cemâ‘atimiz ile ma‘an edâ ederler iken iki seneden beri işbu mesfûrûn iktizâ eden tekâlîfi Ermeni kendi tâifesiyle ve Rum kendi tâifesiyle vermek lâzımdır deyü mugāyir-i kadîm ve hilâf-ı emr-i âlî avârızhânelerimize mukayyed emlâk tasarruf eden Ermenileri hisselerine isâbet edeni bizim cemâ‘atimiz ile ma‘an edâdan men‘ ve kadîme mugāyir te‘addîleri men‘ olunmak matlûbumuzdur dediklerinde yedlerinde olan emr-i âlîşâna nazar olundukda avârıza kaydolunan mahallere mutasarrıf olanlar hîn-i tahrîrde her kangı kilise ve cemâ‘ate kaydolunmuş ise Rum ve Ermeni kangısı olur ise olsun emir ve deftere kesr ve noksan gelmemek üzere ma‘rifet-i şer‘le ta‘dîl ve tesviye vechi üzere hisselerine isâbet edeni edâ eylemeleri musarrah olmağın gıbbe’s-suâl mesfûrûn Kigork ve Serkiz ve Manasfan mahalle-i mezkûrede Rûmiyân cemâ‘atlerine mukayyed emlâkdan ma‘lûmü’l-aded menâzili iştirâ ve temellük eylediklerini ve kendileri ol makūle Ermeni tâifesini Rûmiyân ile ma‘an edâdan men‘ sadedinde olduklarını mukır ve mu‘terif olmalarıyla mesfûrûnun hilâf-ı emr-i âlî te‘addîleri men‘ ve mahalle-i mezkûrda Rûmiyân cemâ‘ati avârızına kaydolunan mahallere mutasarrıf olan Ermeniler ber-mûceb-i emr-i âlî kadîmîsi üzere hisselerine isâbet edeni Rûmiyân cemâ‘atiyle ma‘an edâ etmelerine tenbîh olunduğu huzûr-ı âlîlerine i‘lâm olundu. Fî 22 Muharrem sene 1163