Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 430 Hüküm no: 564 Orijinal metin no: [72b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kira sözleşmesi fesholunan Serkiz v. Haçador’un evi tahliye edip ev sahibi olan Ariton v. Bağdasar’a teslim etmesi Ma‘rûz Sahib-i arzuhâl Ariton v. Bağdasar nâm zimmî meclis-i şer‘de derûn-ı arzuhâlde mezkûr İbrikci Serkiz v. Haçador nâm zimmî muvâcehesinde İstanbul’da Kumkapı kurbünde Bali Paşa mahallesinde vâki‘ menzilimde merkūm Serkiz zimmî beher şehr seksen beşer para icâre ile müşâhereten müste’cirim olmağla târih-i i‘lâm şehri hitâmında fesh-i icâre ile menzil-i mezkûru tahliye ve bana teslîme mezbûr Serkiz zimmîye tenbîh olunmak matlûbumdur deyü da‘vâ eyledikde ol dahi ber-vech-i muharrer menzil-i mezkûrda müşâhereten müste’ciri olduğunu ikrâr ve i‘tirâf etmeğin mûcebince târih-i i‘lâm şehri hitâmında menzil-i mezkûru tahliye ve müdde‘î-i mesfûr Ariton zimmîye teslîme merkūm Serkiz zimmîye tenbîh olunduğu Bâb’dan huzûr-ı âlîlerine i‘lâm olundu. Fî 27 Muharrem sene 1163