Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 430 Hüküm no: 565 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Emine bt. Mehmed’in, muhâlaa yoluyla boşandığı kocası Hacı Hüseyin Ağa b. Hacı Ahmed’e açtığı mehir davasında sulh oldukları Ma‘rûz Sahibe-i arzuhâl Şerife Fâtıma nâm hatunun sadriye kebîre kızı ve on dört yaşında olup sinni ve cüssesinin bulûğa tahammülü olmağla bulûğunu mu‘terife ve zâtı ber-nehc-i şer‘î mu‘arrefe olan Şerife Emine bt. Mehmed nâm hatun meclis-i şer‘-i hatîrde arzuhâlde mastûrü’l-ism zevc-i dâhil-i muhâlı‘ı el-Hâc Hüseyin Ağa b. el-Hâc Ahmed nâm kimesne muvâcehesinde mezbûre Şerife Emine târih-i i‘lâmdan on iki gün mukaddem zevci mezbûr el-Hâc Hüseyin Ağa ile Mahmud Paşa Mahkemesi’nde hilâfeten müvellâ olan müderrisîn-i kirâm-ı zevi’l-ihtirâmdan eş-Şeyh Mustafa Efendi huzûrlarında zevci mezbûrun zimmetinde mütekarrer sekiz bin akçe mehr-i müecceli ve nafaka-i iddet-i ma‘lûmesi üzerlerine ve meûnet-i süknâsı dahi kendi üzerine olmak üzere hul‘ olup hukūk-ı zevciyete müte‘allika âmme-i da‘vâdan mezbûr el-Hâc Hüseyin Ağa’nın zimmetini ibrâ ve ıskāt eylediğini ikrâr ve i‘tirâf edip lâkin hul‘-ı mezkûr ikrâhen olmağın mehr-i mezkûr sekiz bin akçeyi mezbûr el-Hâc Hüseyin Ağa’dan taleb ederim deyü tesâddî eylediği kerh da‘vâsından bâ-vesâtet-i muslihîn mezbûr el-Hâc Hüseyin Ağa ile on bir guruş bedel-i makbûza sulh olup mehr-i mezkûra ve târih-i i‘lâma gelince sâire müte‘allika âmme-i da‘vâdan mezbûr el-Hâc Hüseyin Ağa’nın zimmetini ibrâ ve ıskāt eyleyip bu vechile kat‘-ı nizâ‘ eyledikleri Mahkeme-i Bâb’dan huzûr-ı âlîlerine i‘lâm olundu el-emrü li-men-lehu’l-emr. Fî 28 Muharrem sene 1163