Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 431 Hüküm no: 566 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mustafa’nın alacaklısı Edirneli Mehmed b. Ali’ye kefil olan Ali Beşe ve İsmail Beşe’ye Edirne’de olan Mehmed’i mahkemeye getirmeleri için yirmi beş gün mühlet verildiği Ma‘rûz Sahib-i arzuhâl es-Seyyid Mustafa meclis-i şer‘de Ali Beşe ve İsmail Beşe muvâcehelerinde derûn-ı arzuhâlde mezkûr gāib ani’l-beled Edirneli Mehmed b. el-Hâc Ali b. Eyüb zimmetinde beynimizde ma‘lûmü’l-aded bogası ve bir mavi çuka şalvar ve bir sîmli hançer semenlerinden hakkım olan elli guruşu mezbûr Mehmed’den bundan akdem taleb ve da‘vâ sadedinde olduğumda mezbûrân Ali Beşe ve İsmail Beşe mezbûr Mehmed’i meclis-i şer‘de bana teslîm etmek üzere mezbûr Mehmed’in emriyle herbiri nefsine kefîller olup mezbûr Mehmed hâlâ firâr edip Edirne’de Sultan Bâyezid Câmi‘i kurbünde Küpeli mahallesinde menzilinde olduğunu bana haber vermeleriyle mezbûr Mehmed’i ihzâr eylemeleri’çün tenbîh taleb ederim deyü da‘vâ mezbûrân cevâblarında mezbûr Mehmed’in nefsine vech-i meşrûh üzere kefâletlerini ve mezbûr Mehmed hâlâ Edirne’de mahalle-i mezbûrede vâki‘ menzilinde olduğunu herbiri ikrâr edip yirmi beş güne değin mezbûr Mehmed’i getirip müdde‘î-i mezbûr es-Seyyid Mustafa’ya meclis-i şer‘de teslîme ta‘ahhüd eyledikleri Mahkeme-i Bâb’dan mübâşirleri Kapıkethudâsı Ali Beşe kulları ile huzûr-ı âlîlerine i‘lâm olundu. Fî 28 Muharrem sene 1163