Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 431 Hüküm no: 567 Orijinal metin no: [73a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Mehmed ile oğlu Molla Ahmed b. Halil’in, Molla Mustafa b. Mehmed ile olan alacak-verecek davasında sulh olup birbirlerinin zimmetlerini ibra ettikleri Ma‘rûz Sahibe-i arzuhâl Havva bt. Mehmed zâtı ba‘de’t-ta‘rîfi’ş-şer‘î meclis-i şer‘de derûn-ı arzuhâlde mezkûr Molla Mustafa b. Mehmed muvâcehesinde mezbûr Molla Mustafa zimmetinde bâ-temessük cihet-i karzdan hakkım olan yüz doksan guruşun mukaddemâ yetmiş guruşunu ahz u kabz edip bâkī yüz yirmi guruşun dahi altmış yedi buçuk guruşunu mezbûr Molla Mustafa’nın işbu hazır bi’l-meclis oğlum Molla Ahmed b. el-Hâc Halil zimmetinde cihet-i karzdan hakkı olan altmış yedi buçuk guruşa takās ve mahsûb eylediğinde ben dahi ba‘de’l-kabûl bâkī elli iki buçuk guruşun dahi iki buçuk guruşunu mezbûr Molla Mustafa işbu meclis-i şer‘de bana edâ ve teslîm edip bâkī elli guruşu dahi gāib ani’l-meclis Hâfız Mustafa Efendi nâm kimesneye cihet-i kefâletden olan deynim için mezbûr Hâfız Mustafa Efendi’ye vermek üzere takās ve mahsûb etmişidim hâlâ meblağ-ı mezbûr elli guruşu mezbûr Molla Mustafa merkūm Hâfız Mustafa Efendi’ye vermeyip zimmetinde kalmağla taleb ederim deyü da‘vâ ol dahi bi’l-cümle kazıyye vech-i meşrûh üzere olduğunu ikrâr ve i‘tirâf etmeğin mûcebince meblağ-ı bâkī-i mezbûr elli guruşu mezbûre Havva Hatun’a edâ ve teslîme mezbûr Molla Mustafa’ya ba‘de’t-tenbîh mezbûr[e] Havva Hatun merkūm Molla Mustafa muvâcehesinde ber-vech-i muharrer meblağ-ı bâkī-i mezkûr elli guruşdan mâ‘adâ târih-i i‘lâma gelince zikrolunan husûslara ve sâire müte‘allika âmme-i da‘vâdan ben mezbûr Molla Mustafa’nın zimmetini ibrâ ve ıskāt edip ol dahi kezâlik benim ve işbu oğlum mezbûr Mustafa’nın zimmetini ibrâ ve ıskāt eyledi deyü olan ikrârını mezbûr Molla Mustafa ve oğlu mezbûr Molla Ahmed tasdîk eyledikleri Mahkeme-i Bâb’dan huzûr-ı âlîlerine i‘lâm olundu. Fî 28 Muharrem sene 1163