Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 438 Hüküm no: 577 Orijinal metin no: [74b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ayşe Hatun ile cebecilerinden Seyyid Osman Beşe’nin birbirlerindeki alacak davasından vazgeçip zimmet ibrası yaptıkları Ma‘rûz Zâtı ta‘rîf-i şer‘î ile mu‘arrefe olan sahibe-i arzuhâl Şerife Âişe bi’t-terâzî meclis-i şer‘de Dergâh-ı âlî cebecilerinden derûn-ı arzuhâlde mezkûrü’l-ism es-Seyyid Osman Beşe muvâcehesinde târih-i i‘lâmdan on yedi gün mukaddem mahmiye-i İstanbul’da Süleyman Ağa mahallesinde vâki‘ mezbûr es-Seyyid Osman’ın menziline vardığımda eşyâ-i memlûkemden mecmû‘u yüz elli guruş kıymetli yirmi iki miskāl bir çift altın bilezik ve otuz beş miskāl bir altın kuşağımı ve bir çift zümrüd küpemi mezbûr es-Seyyid Osman alıkomuş idi eşyâ-i mezkûremi taleb ederim deyü da‘vâya tesâddî eylediğimde ol dahi gāibetü ani’l-meclis zevcesi Hadîce nâm hatuna mu‘âlece için sana eczâ harcı olmak üzere kırk guruş ile elli guruş kıymetli bürüncük bez vermişidim deyü benden taleb ve da‘vâya tesâddî etmişidi herbirimiz müdde‘âlarımızı ba‘de’l-inkâr ve’l-münâza‘a bâ-vesâtet-i muslihîn herbirimiz da‘vâ-yı mezkûrelerimizden meccânen fâriğler olup zikrolunan husûslara müte‘allika âmme-i da‘vâdan herbirimiz âharın zimmetini ibrâ ve ıskāt eyledik deyü olan ikrârını mezbûr es-Seyyid Osman dahi tasdîk eylediği Mahkeme-i Bâb’dan <> Kullukçu Ali Çavuş iltimâsıyla huzûr-ı âlîlerine i‘lâm olundu. Fî 4 Safer sene 1163