Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 439 Hüküm no: 579 Orijinal metin no: [74b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ebubekir’in, İbrahim’deki alacağına kefil olan oğlu Kasım’ın ödemesi talebiyle açtığı davada sulh oldukları Bâ-mühr-i hazret-i efendi Ma‘rûz Sahib-i arzuhâl es-Seyyid Mehmed b. el-Hâc Ebûbekir meclis-i şer‘de es-Seyyid Kasım b. es-Seyyid İbrahim muvâcehesinde bin yüz kırk beş senesinde Ayıntab’da fevt olan babam mezbûr el-Hâc Ebûbekir’in terekesinden bana mevrûs olup vasiyyim olan Emir Ağazâde Ebûbekir Ağa’nın makbûzu olan mal-ı mevrûsumdan vasiyyim mezkûr Ebûbekir ağa târih-i mezbûrda işbu merkūm es-Seyyid Kasım’ın babası hâlâ Ayıntab sükkânından es-Seyyid İbrahim nâm kimesneye iki bin guruş ikrâz ve teslîm edip ol dahi istikrâz ve kabz ve istihlâk edip ba‘dehû vasiyyim olan mezbûr fevt olmağla ammizâdem gāib ani’l-beled el-Hâc Mehmed meblağ-ı mezkûrdan üç yüz guruşunu mezbûr es-Seyyid İbrahim’den benim için bi’l-velâye ahz u kabz edip bâkī bin yedi yüz guruş mezbûr es-Seyyid İbrahim zimmetinde kalmağla meblağ-ı bâkī-i mezkûre işbu es-Seyyid Kasım kefâlet-i sahîha-i şer‘iye ile kefîl ve dâmin olmağla meblağ-ı mezkûru bi-hükmi’l-kefâle mezbûr es-Seyyid Kasım’dan taleb ederim deyü tesâddî eylediğim da‘vâmdan tavassut-ı muslihûn ile an-inkâr otuz beş guruş bedel-i makbûza sulh olup ancak kefâlet da‘vâsından mezbûr es-Seyyid Kasım’ın zimmetini berî eyledim dediğini mezbûr es-Seyyid Kasım dahi tasdîk edip bu vechile kat‘-ı nizâ‘ eyledikleri ba‘de’t-tescîl huzûr-ı âlîlerine i‘lâm olundu. Fî 5 Safer sene 1163