Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 439 Hüküm no: 580 Orijinal metin no: [74b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. Mehmed’e borcu olan Tüccar İbrahim b. Hasan’ın zengin olduğu ispat edildiğinden borcunu ödemedikçe hapisten çıkarılmayacağı Bâ-mühr-i hazret-i efendi Ma‘rûz Sahib-i arzuhâl Molla Süleyman b. el-Hâc Mehmed’in bâ-i‘lâm-ı şer‘î cihet-i şer‘îden yedi yüz dokuz buçuk guruş iki para ile medyûnu olan Tokat tüccârından el-Hâc İbrahim b. Hasan meclis-i şer‘de dâyini olan mezbûr Molla Süleyman ile terâfu‘larında mezbûr el-Hâc İbrahim îsârını da‘vâ edip dâyini mezbûr dahi merkūm el-Hâc İbrahim’in yesârını da‘vâ etmeğin şer‘an yesâr beyyinesi evlâ olduğuna binâen dâyin-i mezbûr Molla Süleyman medyûnu merkūm el-Hâc İbrahim’in yesârını udûlden ve tüccârdan İbrahim Çelebi b. Hüseyin ve Ömer Ağa b. el-Hâc Ramazan ve Hüseyin Çelebi b. Osman ve İbrahim Çelebi b. Şa‘bân şehâdetleriyle mezbûr el-Hâc İbrahim muvâcehesinde vech-i şer‘î üzere isbât etmeğin mûcebince meblağ-ı mezkûr yedi yüz dokuz buçuk guruş iki parayı mezbûr Molla Süleyman’a tamamen edâ ve teslîm etmedikçe habsden ıtlâk meşrû‘ olmadığı huzûr-ı âlîlerine i‘lâm olundu. Fî 5 Safer sene 1163