Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 440 Hüküm no: 582 Orijinal metin no: [75a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Pedros v. İsrail’in Mehmed Efendi b. Hacı Osman’da olan alacağını taksitler halinde tahsil etmek üzere anlaştıkları Ma‘rûz Derûn-ı arzuhâlde mezkûr Kürkçü Pedros v. İsrail nâm zimmî meclis-i şer‘de Mâliye kalemi kâtiblerinden sahib-i arzuhâl Mehmed Efendi b. el-Hâc Osman mahzarında mezbûr Mehmed Efendi yedimden iştirâ ve kabz eylediği iki tulum sincab kürk semeninden kırk beş guruş hakkımdan beş buçuk guruşunu mezbûr Mehmed Efendi yedinden ba‘de’l-kabz otuz dokuz buçuk guruş hakkım bâkī kalmağla meblağ-ı bâkī-i mezkûru dahi mezbûr Mehmed Efendi’den taleb ederim deyü ba‘de’d-da‘vâ ve’s-suâl mezbûr Mehmed Efendi cevâbında fi’l-hakīka müdde‘î-i mesfûra cihet-i merkūmeden ol mikdâr guruş deyni olduğunu ikrâr lâkin müdde‘î-i mesfûr Pedros zimmî târih-i i‘lâm senesi Muharremi’l-harâm’ının yirmi üçüncü günü meblağ-ı mezkûr kırk beş guruşu beher şehr kendiye beşer buçuk guruş vermek üzere beni mesfûr Pedros zimmî tecîl ve taksît eyledikde ben dahi ber-vech-i muharrer meblağ-ı mezkûru müeccelen ve mukāssaten edâya ta‘ahhüd eylediğimden sonra meblağ-ı mezkûrdan beş buçuk guruşunu müdde‘î-i mesfûra teslîm ve yedine bir kıt‘a temessük dahi i‘tâ etmişidim deyü eylediği def‘ini merkūm Pedros zimmî dahi mukır ve mu‘terif olmağın mûcebince meblağ-ı bâkī-i mezkûr otuz dokuz buçuk guruşu müeccelen ve mukāssaten müdde‘î-i mesfûr Kürkçü Pedros zimmîye edâ ve teslîme mezbûr Mehmed Efendi’ye ba‘de’t-tenbîh meblağ-ı mezkûr ayda beşer buçuk guruş mukāssaten edâsına Ekmekçizâde Mehmed Çavuş b. Mustafa dahi kefîl olduğu huzûr-ı âlîlerine i‘lâm olundu el-emrü li-men-lehu’l-emr. Fî 5 min-Saferü’l-hayr sene 1163