Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 441 Hüküm no: 583 Orijinal metin no: [75a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Mustafa’nın kendisini üç defa boşayan kocası Testereci Hüseyin b. Feyzullah’ta ilk iki boşanmasına ait mehir bedellerini ödemediği iddiasıyla açtığı davayı ispat edemediği Ma‘rûz İstanbul’da Mollahüsrev mahallesi sâkinelerinden olup zâtı ta‘rîf-i şer‘î ile mu‘arrefe olan Hadîce bt. Şeyh Mustafa nâm hatun meclis-i şer‘de zevc-i sâbıkı Destereci Hüseyin b. Feyzullah mahzarında târih-i i‘lâmdan on altı seneden beri mezbûr Hüseyin beni üç def‘a kırkar guruş mehr-i müeccel tesmiyesiyle kendiye akd ve tatlîk edip ancak mezbûr Hüseyin’in akd-i sâlisde zimmetinde mütekarrer ve ma‘kūdün-aleyh olan kırk guruş mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere mezbûr Hüseyin ile hul‘ olup yalnız akd-i sâlisde olan hukūk-ı zevciyete müte‘allika âmme-i da‘vâdan mezbûr Hüseyin’in zimmetini ibrâ ve ıskāt etmişidim akd-i evvel ile sânîde olan kırkar guruşdan cem‘an seksen guruşu mezbûr Hüseyin’den taleb ederim deyü ba‘de’d-da‘vâ mezbûr Hüseyin cevâbında ber-vech-i muharrer bundan akdem zevcesi olup üç def‘a tatlîkını ikrâr lâkin akd-i evvel ve sânîde olan kırkar guruşdan cem‘an seksen guruşa müte‘allika âmme-i da‘vâdan dahi mezbûre Hadîce Hatun hul‘-ı mezkûrda benim zimmetimi ibrâ ve ıskāt etmişidi deyü ba‘de’d-def‘ ve’l-inkâr mezbûr Hüseyin ber-vech-i muharrer def‘ini beyâna kādir olmamağla mezbûre Hadîce Hatun’a üç def‘a yemîn teklîf olundukda mezbûre Hadîce Hatun yemînden nükûl etmeğin mûcebiyle mezbûre Hadîce mezbûr Hüseyin’e mehreyn-i mezkûreyn seksen guruş mutâlebesiyle bî-vech mu‘ârazadan men‘ olunduğu Bâb’dan huzûr-ı âlîlerine i‘lâm olundu bâkī fermân men-lehu’l-emrindir. Fî 20 Muharrem sene 1163