Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 442 Hüküm no: 584 Orijinal metin no: [75a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gerede’nin Demirciler köyünden Hatib İbrahim Efendi b. Musa ile kardeşi Çukadar Halil Ağa’nın, ev ve anbârlarını yakıp zahire ve eşyalarının telef olduğu iddiasıyla köylüleri Hasan b. Hüseyin’e açtıkları tazmin davasında sulh oldukları Bâ-mühr-i hazret-i efendi Ma‘rûz Sahibân-ı arzuhâl vilâyet-i Anadolu’da Gerede kazâsına tâbi‘ Demirciler nâm karye ahâlîsinden olup İstanbul’da müsâfiren sâkin Hatîb İbrahim Efendi b. Musa ve karındaşı Çukadâr Halil Ağa meclis-i şer‘de yine karye-i mezbûre ahâlîsinden Hasan b. Hüseyin nâm kimesne muvâcehesinde mezbûr Hasan yedimizde ale’l-iştirâk mülkümüz olup karye-i merkūmede vâki‘ ma‘lûmü’l-hudûd menzilimizi ve anbârımızı ve ma‘lûmü’l-keyl ve’l-vezn zehâirimizi târih-i i‘lâmdan üç sene mukaddem bi-gayr-ı hakkın amden ihrâk ve itlâf etmekle mecmû‘unun kıymet-i mislîsi olan bin guruşu mezbûr Hasan’dan taleb ve da‘vâ ve lede’t-terâfu‘ı’ş-şer‘î müdde‘âmıza ikāmet-i beyyine dahi eylediğimizde şâhidlerimiz tezkiye olunmak esnâsında beynimize muslihûn tavassut edip da‘vâ-yı mezkûremizden bizi mezbûr Hasan ile yüz yetmiş beş guruş üzerine bi’t-terâzî sulh eylediklerinde biz dahi sulh-ı mezkûru kabûl edip bedel-i mezkûrdan mâ‘adâ âmme-i da‘vâdan herbirimiz âharın zimmetini ibrâ-i âm ile ibrâ ve ıskāt edip ve bedel-i mezkûr yüz yetmiş beş guruşun mezbûr Hasan’dan tahsîli ve bize teslîmi için ta‘yîn buyrulacak mübâşir ile ma‘an vilâyetimiz olan kazâ-i mezbûra merkūm Hasan ve biz gidip bedel-i mezkûru bize kazâ-i mezbûra vardığımızdan sonra mübâşir ma‘rifetiyle edâ etmesine biz ve merkūm Hasan râzı olduk dediklerini merkūm Hasan dahi tasdîk edip bu vechile kat‘-ı nizâ‘ eyledikleri huzûr-ı âlîlerine i‘lâm olundu. Fî 8 Safer sene 1163