Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 442 Hüküm no: 585 Orijinal metin no: [75a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Hacı Ömer’in, kendisini dövüp çocuğunu düşürmesine sebep olduğu iddiasıyla kocası Mehmed’e açtığı davayı ispat edemediği Bâ-mühr-i hazret-i efendi Ma‘rûz İstanbul’da Hoca Paşa mahallesinde sâkine olup zâtı ta‘rîf-i şer‘î ile mu‘arrefe olan Rukiye bt. el-Hâc Ömer nâm hatun dîvân-ı alîlerinde ma‘kūd meclis-i şer‘de sahib-i arzuhâl diğer Ömer’in kebîr oğlu ve mezbûrenin zevc-i mutallıkı Mehmed mahzarında târih-i i‘lâmdan elli gün mukaddem zevciyet beynimizde kāime iken mezbûr Mehmed kendi menzilimizde üzerime hücûm ve yumruk ile karnıma ve arkama bi-gayr-ı hakkın darb edip darbından nâşî müstebînü’l-hilka bir cenîn-i meyyit ilkā etmişidim hâlâ mûceb-i şer‘îsini mezbûr Mehmed’den taleb ederim deyü ba‘de’d-da‘vâ ve’l-inkâr müdde‘iye-i mezbûre Rukiye ber-vech-i muharrer müdde‘âsını beyân için bi’d-defa‘ât ba‘de’l-istimhâl ve’l-imhâli’ş-şer‘î herbirinde müddet-i mehl tamam olup ityân-ı beyyineden bi’l-külliye ızhâr-ı acz ile istihlâf etmeğin gıbbe’t-tahlîf müdde‘iye-i mezbûre Rukiye bilâ-beyyine bî-vech mu‘ârazadan men‘ olunduğu huzûr-ı âlîlerine i‘lâm olundu bâkī fermân hazret-i veliyyü’l-emrindir. Fî 11 min-Safer sene 1163