Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 443 Hüküm no: 586 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Abdullah’ın, Surre Emini Hacı Hasan Vakfı’ndan kiracısı olduğu menzile yaptırdığı binaların masrafının ödenmesi talebiyle vakfın mütevellisi Mehmed Efendi b. Hacı Hasan’a açtığı davada sulh oldukları Bâ-mühr-i hazret-i efendi Ma‘rûz İstanbul’da Hacı Evhad mahallesi sâkinelerinden olup zâtı ta‘rîf-i şer‘î ile mu‘arrefe Hadîce bt. Abdullah nâm hatun meclis-i şer‘de sahib-i arzuhâl Hüseyin b. İbrahim mahzarında Surre emîni el-Hâc Hasan Vakfı’nın mütevellîsi olan Mehmed Efendi b. el-Hâc Hasan’ın vekîl-i şer‘îsi Abdülcelil Çelebi b. İbrahim hazır olduğu hâlde vakf-ı mezkûr musakafâtından mârrü’z-zikr Hacı Evhad mahallesinde vâki‘ etrafı Hasan Ağa menzili ve bostan ve tarîk-ı âm ile mahdûd ma‘lûmü’l-müştemilât beher şehr yirmi beşer akçe icâre-i müecceleli vakıf menzili bundan esbak mütevellî-i mezbûr Mehmed Efendi taraf-ı vakfdan olmak üzere el-Hâc Abdi’ye bin yüz elli bir senesinde bi’l-icâreteyn îcâr ve mezbûr el-Hâc Abdi dahi sene-i mezbûrede bâ-ma‘rifet-i mütevellî bedel-i ma‘lûm ile bana ferâğ ve tefvîz edip yedimde hakk-ı müfevvazım iken mezbûr Hüseyin menzil-i mahdûd-ı mezkûr bi’l-icâreteyn benim tasarrufumda idi hatta bin yüz kırk yedi senesinde diyâr-ı âhara gider olduğumda menzil-i mezkûrun icâre-i müeccelesini taraf-ı vakfa edâya kayınvâlidem diğer Hadîce bt. Abdullah’ı tarafımdan vekîl edip ol dahi edâ eder iken mütevellî-i mezbûr Mehmed Efendi menzil-i mezkûru bi-gayr-ı vech mezbûr el-Hâc Abdi’ye îcâr ol dahi mezbûre Hadîce Hatun’a ferâğ etmekle tasarrufuma istirdâd ederim deyü benden vekîl-i mezbûr hazır olduğu hâlde da‘vâ ve müdde‘âsını ber-nehc-i şer‘î isbât edip menzil-i mahdûd-ı mezkûrdan kasr-ı yedime tenbîh olundukda ben dahi menzil-i mezkûra malım ile mülküm olmak üzere bâ-izn-i mütevellî müceddeden binâ ve ihdâs eylediğim ebniyeye sarf eylediğim ma‘lûmü’l-mikdâr meblağı mezbûr Hüseyin’den taleb ve da‘vâ sadedinde olduğumda beynimizde ba‘de vukū‘ı’l-münâza‘a tavassut-ı muslihûn ile mezbûr Hüseyin ve mütevellî-i vakf-ı merkūm Mehmed Efendi ile yüz guruş bedel-i makbûza sulh olup ba‘de’l-yevm menzil-i mezkûrda ihdâs eylediğim ebniyeye ve sâire müte‘allika âmme-i da‘vâdan mezbûr Hüseyin’in ve mütevellî-i mezbûrun zimmetlerini vakf-ı mezkûru ibrâ-i âm ile ibrâ ve ıskāt eyledim onlar dahi bana medfû‘ları olan yüz guruşa müte‘allika da‘vâdan herbiri benim zimmetimi ibrâ-i âm ile ibrâ ve ıskāt eyledi dediğini mezbûr Hüseyin ve vekîl-i merkūm tasdîk edip bu vechile kat‘-ı nizâ‘ eyledikleri huzûr-ı âlîlerine i‘lâm olundu bâkī fermân men-lehu’l-emrindir. Fî 15 Muharrem sene 1163