Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 444 Hüküm no: 587 Orijinal metin no: [75b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gemiciler Kampanos, Marko, Tolo, Yorgi, Tamas ve Kanaki’nin, vefat eden Mihalaki Reis’de alacakları olduğu iddiasıyla oğlu Manolaki Reis’e açtıkları davada sulh oldukları Ma‘rûz Mellâh tâifesinden arzuhâl eden Kampanos v. Yani ve Marko v. Yani ve Tolo v. Todori ve Yorgi v. Manol ve Tamas v. Yorgi ve Kanaki v. Marino nâm zimmîler meclis-i şer‘-i enverde rüesâ tâifesinden arzuhâlde ismi mastûr olup bundan akdem hâlik olan Mihalaki nâm zimmînin sulbî kebîr oğlu ve hasran vârisi olmağla terekesiyle üç direkli sefînesine bi’l-verâse vaz‘-ı yed eden Reis Manolaki nâm zimmî muvâcehesinde bizler sefîne-i mezbûrede mellâh olup selef kavliyle hâlik-i mesfûr Mihalaki zimmîye hayatında sefîne-i mezbûresinde yetmiş beş gün mellâhlık eyleyip kereste navulundan mesfûr Mihalaki zimmî zimmetinde selefimizden iki yüz elli guruş hakkımız olup kable’l-edâ mesfûr Mihalaki zimmî hâlik olup oğlu mersûm Manolaki zimmî terekesini ve sefînesini bi’l-verâse kabz etmekle meblağ-ı merkūm iki yüz elli guruşu oğlu mersûm Manolaki zimmîden taleb ederiz deyü tesâddî eylediğimiz selef da‘vâlarımızdan bâ-tavassut-ı muslihîn oğlu mersûm Manolaki zimmî ile herbirimize on beşer guruş vermek üzere sulh olup ve bedel-i sulh-ı mezkûru herbirimiz yedinden bi-kadri’l-hısas tamamen ahz u kabz eyleyip mâ‘adâsına ve târih-i i‘lâma gelince sâire müte‘allika âmme-i da‘vâdan oğlu mersûm Manolaki zimmî zimmetini ibrâ ve ıskāt eyledik deyü olan ikrârlarını reis-i mersûm Manolaki zimmî tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî 9 S sene 1163