Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 445 Hüküm no: 588 Orijinal metin no: [75b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ariton v. Bağdasar’ın, evinden çıkardığı kiracısı Serkiz v. Haçador’dan aldığı parayı kiracısına iade etmesine yapılan tenbih Ma‘rûz Sahib-i arzuhâl Serkiz v. Haçador nâm zimmî meclis-i şer‘de derûn-ı arzuhâlde mastûr Ariton v. Bağdasar nâm zimmî muvâcehesinde ben bundan akdem mesfûr Ariton zimmînin Bali Paşa mahallesinde vâki‘ menzilinde müşâhereten müste’ciri olduğum hâlde beni menzilden ihrâcıma i‘lâm-ı şer‘î ettirdikde târih-i i‘lâmdan on bir gün mukaddem menzil-i mezkûrdan ihrâc etmemek için ber-vech-i peşîn otuz üç guruş mesfûr Ariton’a icâre vermişidim hâlâ beni menzil-i mezkûrdan yine ihrâc etmekle meblağ-ı mezkûru mesfûr Ariton zimmîden taleb ederim deyü ba‘de’d-da‘vâ ve’l-inkâr müdde‘î-i merkūm ber-vech-i muharrer müdde‘âsını lede’t-tezkiye adâletleri zâhir olan Mehmed Beşe b. İbrahim nâm kimesne ile diğer Serkiz v. Marat nâm zimmî şehâdetleriyle mesfûr Ariton muvâcehesinde vech-i şer‘î üzere isbât etmeğin mûcebince meblağ-ı mezkûr otuz üç guruşu müdde‘î-i merkūm Serkiz zimmîye edâ ve teslîme mesfûr Ariton’a tenbîh olunduğu Mahkeme-i Bâb’da tescîl ve huzûr-ı âlîlerine i‘lâm olundu. Fî 9 min-Safer sene 1163