Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 445 Hüküm no: 589 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bendereğli kasabasından Mehmed Reis b. İbrahim ile Abdurrahman Efendi b. Ömer’in birbirleriyle olan alacak-verecek davalarında sulh olup zimmetlerini ibra ettikleri Ma‘rûz Bahr-i Siyah’da vâki‘ Bendereğli kasabası ahâlîsinden ve rüesâ tâifesinden sahib-i arzuhâl Mehmed b. İbrahim nâm kimesne Bâb Mahkemesi’nde arzuhâlde mezkûrü’l-ism olup Kapıkethudâsı Abdullah Beşe mübâşeretiyle meclis-i şer‘-i envere ihzâr ettirdiği Abdurrahman Efendi b. Ömer muvâcehesinde târih-i i‘lâmdan bir buçuk sene mukaddem mezbûr Abdurrahman Efendi’nin emriyle kendi malımdan bi-şarti’r-rücû‘ on beş zirâ‘ bir çekleve sefînesi ta‘mîrine ber-mantûk-ı defter-i müfredât masrûfumu mezbûr Abdurrahman Efendi ile bin yüz altmış iki senesi Şa‘bâni’l-mu‘azzam’ının on beşinci günü Ayazmakapısı hâricinde Destereci Ahmed Beşe’nin dükkânında hesâb eylediğimizde üç yüz guruşa bâliğ olmağla mezbûr Abdurrahman Efendi meblağ-ı merkūm üç yüz guruşu kabûl ve zimmetinde deyni olmak üzere ikrâr ve i‘tirâf ettikden sonra meblağ-ı mezbûrun yüz yirmi guruşunu bana def‘ ve teslîm eyleyip yüz seksen guruşu bâkī kalmağla meblağ-ı bâkī-i mezbûr yüz seksen guruşu mezbûr Abdurrahman Efendi’den taleb ederim deyü tesâddî eylediği da‘vâsında bâ-vesâtet-i muslihîn mezbûr Abdurrahman Efendi ile an-inkâr otuz guruş bedel-i makbûza sulh olup mâ‘adâ yüz elli guruşa ve târih-i i‘lâma gelince sâire müte‘allika âmme-i de‘âvî ve kâffe-i mutâlebât ve eymân ve muhâsamâtdan mezbûr Abdurrahman Efendi’nin zimmetini ibrâ ve ıskāt eyledikde ol dahi mezbûr Mehmed Reis’den matlûbu olan sefîne-i mezkûre demirine ve sâir âlâtına müte‘allika âmme-i da‘vâdan mezbûr Mehmed Reis’in zimmetini ibrâ ve ıskāt edip ol vechile kat‘-ı nizâ‘ ettikleri tescîl ve mübâşir-i merkūm iltimâsıyla huzûr-ı âlîlerine i‘lâm olundu el-emrü li-men-lehu’l-emr. Fî 11 S sene 1163