Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 446 Hüküm no: 591 Orijinal metin no: [76a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçador v. Avanis’in, Aşçı Polad v. Şahin’in işlettiği dükkânda kendisine ait alet ve eşyaların icarında alacağı olduğu iddiasıyla açtığı davada haksız bulunup davanın reddedildiği <> <> Ma‘rûz Hamamcı tâifesinden sahib-i arzuhâl Haçador v. Avanis zimmî meclis-i şer‘de aşcı tâifesinden derûn-ı arzuhâlde mastûr Polad v. Şahin muvâcehesinde İstanbul’da Kurşunlu Han kurbünde vâki‘ aşcı dükkânında mevcûd otuz vakıyye evân[î]-ı nuhâsiye ve sâir âlât-ı ma‘lûmenin üç sehim i‘tibârıyla iki sehmi mesfûr Polad zimmînin ve bir sehmi gāib ani’l-meclis Kirkor nâm zimmînin yedlerinde mülk ve hakları iken gāib-i mesfûr Kirkor zimmî bundan akdem mâlik olduğu bir sehim hissesi olan on vakıyye evân[î]-ı nühâsiye ile sâir âlâtın sülüsünü ba‘de’l-ifrâz ma‘lûm-ı medfû‘ ve makbûza bana bey‘ ve temlîk ve teslîm eylediğimden [eylediğinden] sonra ben dahi ba‘de’l-ahz ve’l-kabz zikrolunan on vakıyye evân-ı nühâsiye ile sâir âlâtı beher sene altışar guruş icâre ile mezbûr Polad zimmîye îcâr ve teslîm etmişidim hâlâ evân-ı nühâsiyenin ve âlât-ı sâirenin sülüsü benim olmağla icâremi taleb ederim deyü ba‘de’d-da‘vâ mezbûr Polad cevâbında fi’l-hakīka dükkân-ı mezkûrda olan evân-ı nühâsiyeden bir sehimine mutasarrıf olan gāib-i mezbûr Kirkor hissesini ba‘de’l-ifrâz müdde‘î-i mezbûr Haçador’a ber-vech-i muharrer bey‘ ve teslîm ol dahi tesellüm ve kabûl ve ihrâc eylediğini ikrâr lâkin âlât-ı mezkûreyi müdde‘î-i mezbûr Haçador kendiye tekrar ber-vech-i muharrer îcâr ve teslîm eylediğini ba‘de’l-inkâr müdde‘î-i mesfûr ber-vech-i muharrer müdde‘âsını beyâna kādir olmamağla mezbûr Polad zimmî bi’t-taleb ba‘de’t-tahlîfi’ş-şer‘î mûcebiyle müdde‘î-i mesfûr Haçador bilâ-beyyine mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 15 Safer sene 1163