Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 447 Hüküm no: 592 Orijinal metin no: [76a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe’nin borcunu kabul ettiği miktarı Mehmed Efendi’ye ödemesi, Mehmed Efendi’ye de fazla alacak iddiasını ispat etmesi için mühlet verildiği Ma‘rûz Sahib-i arzuhâl Mehmed Efendi meclis-i şer‘-i hatîrde derûn-ı arzuhâlde mezkûrü’l-ism Hüseyin Beşe muvâcehesinde mezbûr Hüseyin Beşe zimmetinde cihet-i karzdan bi’d-defa‘ât doksan beş guruş ve otuz para ve yedimden iştirâ ve kabz eylediği bir re’s kır bargir semeninden dahi elli guruş ve iki kıt‘a fermân ihrâcı için on dört guruş ki cem‘an yüz elli dokuz guruş otuz para hakkım olmağla meblağ-ı mezkûru mezbûr Hüseyin Beşe’den taleb ederim deyü ba‘de’d-da‘vâ ve’s-suâl mezbûr Hüseyin Beşe cevâbında müdde‘î-i mezbûr Mehmed Efendi’ye zimmetinde bâ-temessük ancak altmış yedi guruş deyni olduğunu ikrâr mâ‘adâyı inkâr etmeğin mezbûr Hüseyin Beşe mukır ve mu‘terif olduğu meblağ-ı mezkûr altmış yedi guruşun dahi elli iki guruşunu müdde‘î-i mezbûr Mehmed Efendi’ye def‘ ve teslîm eyledim deyü ol mikdârında ba‘de’d-def‘ ve’l-inkâr mezbûr Hüseyin Beşe def‘-i mezkûrunu bir vechile beyâna kādir olmayıp müdde‘î-i mezbûr Mehmed Efendi bi’t-taleb ba‘de’t-tahlîfi’ş-şer‘î ikrârı mertebesi olan meblağ-ı mezkûr altmış yedi guruşu müdde‘î-i mezbûr Mehmed Efendi’ye edâ ve teslîme mezbûr Hüseyin Beşe[‘ye] ba‘de’t-tenbîh ziyâde müdde‘âsı olan doksan iki guruş otuz para için müdde‘î-i mezbûr Mehmed Efendi beyâna havâle olunduğu Mahkeme-i Bâb’dan huzûr-ı âlîlerine i‘lâm olundu. Fî 13 Zilka‘de sene 1162