Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 448 Hüküm no: 593 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manol v. Laskari’nin alacak iddiasıyla Anastaş v. Marat’a açtığı davada sulh olup ibra ettiği Ma‘rûz Kapıkethudâsı Mehmed Beşe mübâşeretiyle Bâb Mahkemesi’ne ihzâr olunan Anastaş v. Marat nâm zimmînin hasmı Manol v. Laskari nâm zimmî meclis-i şer‘-i enverde mesfûr Anastaş zimmî muvâcehesinde târih-i i‘lâmdan sekiz sene mukaddem mesfûr Anastaş zimmî Samatya kurbünde Aya Nikola mahallesinde mütemekkin olduğu menzilinde altın ve guruş mahlût malımdan yüz otuz guruş karz vermişidim meblağ-ı merkūm mesfûr Anastaş zimmînin zimmetinde kalmağla hâlâ taleb ederim deyü da‘vâ eylediğimde ol dahi külliyyen inkâr ve beynimizde münâza‘ât-ı kesîre cereyân etmeğin bâ-tavassut-ı muslihîn mesfûr Anastaş zimmî ile an-inkâr on bir guruş bedel-i makbûza sulh olup mâ‘adâ yüz on dokuz guruşa ve sâire müte‘allika âmme-i da‘vâdan mesfûr Anastaş zimmînin zimmetini ibrâ ve ıskāt eyledim deyü olan ikrârını mesfûr Anastaş zimmî tasdîk eylediği mübâşir-i merkūm iltimâsıyla huzûr-ı âlîlerine i‘lâm olundu el-emrü li-men-lehu’l-emr. Fî 19 S sene 1163