Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 448 Hüküm no: 594 Orijinal metin no: [76b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Niğde ahalisinin kendilerine yüksek ribh ile borç verip vadesinden önce isteyip rahatsız ettiği iddiasıyla Niğdeli Seyyid Abdullah b. Hüseyin’in bir daha belirlenen miktardan fazla ribh istemeyip zamanından önce ödemelerini istemeyeceğini taahhüt edip sulh oldukları Ma‘rûz Vilâyet-i Anadolu’da Niğde kazâsı ahâlîsinden ashâb-ı arzuhâl Hüseyin b. Ali ve Ahmed b. Dede nâm kimesneler ile zimmîlerden Çobanoğlu Yovaki v. Anastaş ve Lefter v. Satılmış ve Panayot v. Rüstem ve Marat v. Todori ve Yagop v. İsai nâm zimmîler ve sâirleri nefs-i kasaba-i Niğde ahâlîsinden derûn-ı arzuhâlde mezkûrü’l-ism olup Hasan Çavuş mübâşeretiyle meclis-i şer‘a ihzâr ettirdikleri es-Seyyid Abdullah b. es-Seyyid Hüseyin nâm kimesne muvâcehesinde mezbûr es-Seyyid Abdullah kazâ-i mezkûr ahâlîsinden olmağla lede’l-iktizâ kendiden istidâne eylediğimiz meblağı tama‘ından nâşî ziyâde ribhile bilâ-devr-i şer‘î verip va‘deleri gelmezden mukaddem bizlerden taleb ve cevr ü ezâ eder deyü teşekkî eylediklerinde mezbûr es-Seyyid Abdullah dahi fîmâ-ba‘d merkūmûna ve sâirlerine ikrâz eylediği meblağı fetvâ-yı şerîfe mantûkunca onu on bir buçukdan ziyâdeye vermeyip ve devr-i şer‘î birle sene tamamında taleb edip va‘desi gelmezden mukaddem taleb ve ta‘cîz ve tazyîk etmemek üzere ta‘ahhüd eyledikde merkūmûn dahi râzılar olup bu vechile beynleri ıslâh ve tevfîk olunup kat‘-ı nizâ‘ eyledikleri Mahkeme-i Bâb’dan huzûr-ı âlîlerine i‘lâm olundu. Fî 19 S sene 1163