Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 449 Hüküm no: 596 Orijinal metin no: [76b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Paşazâde İbrahim Efendi Vakfı’na ait yanan evin kiracısı Hacı Ali’nin komşuların evlerine görecek şekilde havale yaptırmamak üzere evi tekrar inşa etmesine izin verildiği Bâ-mühr-i hazret-i efendi Ma‘rûz Fermân-ı âlîlerine imtisâlen kıbel-i şer‘den irsâl olunan keşif nâibimiz İbrahim Efendi dâ‘îleri hâssa mi‘mârı hulefâsından el-Hâc Süleyman ve el-Hâc Mustafa ve İbrahim ve Yakub ile arzuhâlde mezkûr Sultan Bâyezid Câmi‘-i şerîfi kurbünde Yahnikapanı sokağında vâki‘ Paşazâde İbrahim Efendi Vakfı olup arzuhâlde ismi mezkûr el-Hâc Ali’nin bi’l-icâreteyn tasarrufunda olan ma‘lûmü’l-hudûd bir bâb menzile varıp keşf ve müşâhede ettiklerinde menzil-i mezkûr ba‘de’l-ihrâk mezbûr el-Hâc Ali dört sene mukaddem binâsına mübâşeret eylediğinde etrâfında olan menâzil ashâbı herbirimizin menzilinin makarr-ı nisvânı olan mahallerine havâlesi olup zararı vardır deyü da‘vâya tesâddî eylediklerinde ol dahi binâ-i mezkûru nâ-tamam terk edip ba‘dehû lede’l-mürâfa‘a mezbûr el-Hâc Ali’ye iktizâ eden zararı ve havâle-i şer‘iyelerini def‘ etmek üzere gıbbe’t-tenbîhi’ş-şer‘î ol dahi müte‘ahhid ve bu minvâl üzere menzil-i mezkûrun binâ ve itmâmına şürû‘unu mezbûr el-Hâc Ali ikrâr ve i‘tirâf eylediğini ve mi‘mârûn-ı mezbûrûn menzil-i mezkûrun ba‘de’l-mesâha kaddı on dört zirâ‘ ve on sekiz parmak olup on iki zirâ‘dan iki zirâ‘ ve on sekiz parmak ziyâde olduğunu ihbâr eylediklerini mezbûr dâ‘îleri mahâllinde ketb ü tahrîr edip ba‘dehû ümenâ-i şer‘le meclis-i şer‘a inhâ ve takrîr eylediği huzûr-ı âlîlerine i‘lâm olundu. Fî 18 Safer sene 1163