Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 450 Hüküm no: 597 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Kalaycı Ahmed b. Mehmed’in kalaycı dükkânında bulunan aletlerdeki yarım hissesini oğlu İsmail’in diğer hisse sahibi Mehmed Beşe b. Mustafa’ya sattığı [Ma‘rûz] Mahrûse-i Galata müzâfâtından kasaba-i Kasımpaşa’da Kulaksız Ahmed Çelebi mahallesi sükkânından ve kalaycı tâifesinden iken bundan akdem vefât eden Ahmed b. Mehmed b. Abdullah’ın sulbî kebîr oğlu ve hasran vârisi olan sahib-i arzuhâl İsmail nâm kimesne meclis-i şer‘-i hatîrde yine tâife-i mezbûreden ve Dergâh-ı âlî topçularından derûn-ı arzuhâlde mezkûrü’l-ism Mehmed Beşe b. Mustafa muvâcehesinde babam ve mûrisim müteveffâ-yı merkūm Ahmed’in hayatında kalaycılık san‘atında mezbûr Mehmed Beşe şerîki olduğundan mâ‘adâ kasaba-i Tophâne’de Karabaş Mustafa Ağa mahallesinde vâki‘ kalaycı dükkânı ve önünde mevcûd olup gedik ta‘bîr olunur kalaycı âlât-ı ma‘lûmesinin nısf hissesi mezbûr Mehmed Beşe’nin ve nısf hisse-i âhiri babam merkūm Ahmed’in ile’l-vefât yedinde mülkü olup ba‘de vefâtihî bana mevrûs olmağla ben âlât-ı ma‘lûmede olan nısf hissemi bey‘-ı kat‘î ile hissedârım mezbûr Mehmed Beşe’ye elli beş guruşa bey‘ ve temlîk ve teslîm ve semen-i mebî‘ olan elli beş guruşu mezbûr Mehmed Beşe yedinden tamamen ahz u kabz edip nısf hisse-i mezkûrede kat‘a benim alâkam kalmayıp mecmû‘u mezbûr Mehmed Beşe’nin mülkü olmağla ben âlât-ı ma‘lûmeye ve mezbûr Mehmed Beşe’den nakden taleb ve da‘vâ eylediğim otuz üç guruşa ve târih-i i‘lâma gelince sâire müte‘allika âmme-i da‘vâdan mezbûr Mehmed Beşe’nin zimmetini ibrâ ve ıskāt eylediğimde ol dahi ibrâyı kabûl eyledi deyü olan ikrârını mezbûr Mehmed Beşe dahi tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî 20 S sene 1163