Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 451 Hüküm no: 598 Orijinal metin no: [77a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aslan v. Aslan ile Nikagos v. Kasber’in alacak-verecek davasında sulh olup birbirlerinin zimmetlerini ibra ettikleri Ma‘rûz Mahmiye-i İstanbul hısnı ebvâbından Fenerkapısı dâhilinde Abdi Subaşı mahallesinde mütemekkin sahib-i arzuhâl Aslan v. Aslan nâm zimmî meclis-i şer‘-i enverde yine mahmiye-i merkū[me]de Sultan Selim Han tâbe serâhu câmi‘-i şerîfi kurbünde Çukurbostan üzerinde çubukçu odalarında mütemekkin derûn-ı arzuhâlde mezkûrü’l-ism Nikagos v. Kasber v. Norsis nâm zimmî tarafından zikri âtî husûsları tasdîka vekîl olduğu Ayvaz v. Babek ve Bogos v. Ağya nâm zimmîler şehâdetleriyle vech-i şer‘î üzere sâbit olan li-ebeveyn er karındaşı Avanis nâm zimmî muvâcehesinde ben müvekkil-i mersûm Nikagos zimmî zimmetinde cihet-i deyn-i şer‘îden üç bin guruş hakkım vardır deyü müvekkil-i mersûm Nikagos zimmîden taleb ve da‘vâya tesâddî eylediğimde ol dahi meblağ-ı mezbûru külliyyen inkâr eylediğinden mâ‘adâ iki kıt‘a deyn temessükleri mûcebince senin zimmetinde yüz seksen guruş alacağım vardır deyü benden taleb ve da‘vâ sadedinde olmağın beynimizde münâza‘ât-ı kesîre cereyân etmekle bâ-tavassut-ı muslihîn müvekkil-i mersûm Nikagos zimmî ile da‘vâ-yı mezkûremden an-inkâr ben yüz otuz üç guruş bedel-i makbûza sulh olup mâ‘adâ iki bin sekiz yüz yetmiş guruşa ve târih-i i‘lâma gelince sâire müte‘allika âmme-i da‘vâdan müvekkil-i mersûm Nikagos zimmînin zimmetini ibrâ ve ıskāt eylediğimde ol dahi benden müdde‘âsı olan yüz seksen guruşa ve sâire müte‘allika âmme-i da‘vâdan benim zimmetimi ibrâ ve ıskāt eyledikde herbirimiz âharın ibrâsını kabûl eyledi deyü olan ikrârını vekîl-i merkūm Avanis bi’l-vekâle tasdîk eylediği Mahkeme-i Bâb’dan huzûr-ı âlîlerine i‘lâm olundu el-emrü li-men-lehu’l-emr. Fî 21 S sene 1163