Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 451 Hüküm no: 599 Orijinal metin no: [77a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Murtaza Efendi b. Mehmed’den varisleri olan çocuklarına intikal eden kalpakçı dükkânı kiracısı Yuvan’ın firar etmesiyle kapalı kalan dükkândaki eşyaların Kalpakçılar kethudası Niko’ya emanet verilip dükkânın çocuklara teslim edildiği Ma‘rûz Sâdır olan fermân-ı âlîlerine imtisâlen zikri âtî husûsu mahâllinde ketb ü tahrîr için savb-ı şer‘-i enverden me’zûnen irsâl olunan Feyzullah Efendi dâ‘îleri sâbıkā Tersâne-i âmire emîni olup mahmiye-i İstanbul’da Mahmud Paşa mahallesinde sâkin iken bundan akdem vefât eden Murtaza Efendi b. Mehmed’in evlâd-ı sıgārı Mehmed Said ve Mehmed Tahir ve Halil Reşid ve Ümmühani ve Selime ve Afife ve Nâile’nin umûrlarını rü’yete vasîleri olan Dergâh-ı mu‘allâ kapıcıbaşılarından umdetü’l-emâcid ve’l-ekârim câmi‘ü’l-mehâsin ve’l-mekârim izzetlü İbrahim Bey hazretlerinin taraf-ı bâhirü’ş-şereflerinden husûs-ı âti’l-beyâna vekîlleri olduğu el-Hâc Halil b. Abdullah ve Mustafa b. Osman şehâdetleriyle ber-nehc-i şer‘î sâbit olan sahib-i arzuhâl el-Hâc Halil b. Mustafa ve kalpakçılar hirfeti kethudâsı Niko v. Nakar ve Yiğitbaşı Yorgi v. Nikola ve çavuşları Yorgo v. Nikola nâm zimmîler ve sâir ustalar ile sıgār-ı mezbûrûnun babalarından müntakil olup Zindânkapısı dâhilinde vâki‘ mukaffel bir bâb kalpakçı dükkânına varıp huzûr-ı Müslimînde akd-i meclis-i şer‘ ettikde dükkân-ı mezkûra müşâhereten müste’cir olup sekiz aydan beri gaybet-i münkatı‘a ile gāib olan Yuvan nâm zimmî dükkân-ı mezkûru mukaffel bırakıp firâr eylediği civârında sâkin cerîdede mazbûtü’l-esâmî Müslimîn ihbârlarıyla müte‘ayyin oldukdan sonra dükkân-ı mezkûru huzûr-ı Müslimînde feth ve derûnunda mevcûd bulunan yüz yetmiş aded sagīr ve kebîr kırmızı ve yeşil ve beyaz kalpak ve yüz seksen aded alaca ve Londra fes ve seksen aded pervazlık siyah kuzu derisi ve yüz aded siyah kuzu derisi ve bir zirâ‘ kırmızı çuka ve yirmi aded çuka duhan kîsesi ve bir piştahta ve bir Mısır hasırı [77b] ve bir âyine ve bir kalıb ve bir endâzesini kethudâ-yı mezbûr ve sâirleri tahmîn-i sahîh ile tahmîn ve takvîm eylediklerinde min-haysü’l-mecmû‘ kıymetleri on bir bin yüz on akçeye bâliğ olmağın gāib-i mezbûrun hâli mütebeyyin olunca emîn ve müstakīm idiği Müslimûn-ı hâzırûn ihbârlarıyla mütehakkık olan kethudâ-yı mezbûr Niko zimmîyi li-ecli’l-hıfz kayyım nasb ve ta‘yîn olunup eşyâ-i merkūmu bi-a‘yânihâ kayyım-ı merkūma def‘ ve teslîm ve dükkân-ı mezkûru ba‘de’t-tahliye vekîl-i mezbûr el-Hâc Halil’e teslîm eylediğini mezbûr dâ‘îleri mahâllinde ba‘de’t-tahrîr ma‘an mürsel Çukadâr Ahmed b. Ali ve Muhzır Mehmed b. Abdullah ile meclis-i şer‘a gelip alâ-vukū‘ihî inhâ ve takrîr eyledikleri Mahkeme-i Bâb’dan huzûr-ı âlîlerine i‘lâm olundu bâkī fermân men-lehu’l-emrindir. Fî 22 Safer sene 1163