Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 452 Hüküm no: 600 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nahçıvan’ın İlis köyünden Tülbentçi Azarya v. Sator’a borcu olan aynı köyden Mıgırdıç v. Mardiros’un borcunu ödemesine yapılan tenbih Ma‘rûz Vilâyet-i İran’da Nahçıvan eyâletinde İlis nâm karye ahâlîsinden olup hâlâ İstanbul’da ticâret vechi üzere sâkin Dülbendci Azarya v. Satur nâm zimmî muvâcehesinde meclis-i şer‘de yine karye-i mezbûre ahâlîsinden olup han-ı mezkûrda sâkin Mıgırdıç v. Mardiros nâm zimmî muvâcehesinde târih-i i‘lâmdan altı sene mukaddem karye-i mezbûrede işbu bir kıt‘a Ermeni hattıyla olan temessük nâtık olduğu üzere mezbûr Mıgırdıç zimmîye üç yüz doksan guruş ikrâz ve teslîm ol dahi yedimden istikrâz ve tesellüm ve kendi mesârifine sarfla istihlâk etmekle meblağ-ı mezbûru hâlâ mezbûr Mıgırdıç zimmîden taleb ederim deyü ba‘de’d-da‘vâ ve’l-inkâr müdde‘î-i mezbûr Azarya ber-vech-i muharrer müdde‘âsını lede’t-tezkiye şehâdetleri makbûle tüccârdan olup mârrü’z-zikr İlis karyesi ahâlîsinden han-ı mezkûrda sâkinler Papo v. Avak ve Saşiro v. Vanil zimmîler şehâdetleriyle mezbûr Mıgırdıç muvâcehesinde vech-i şer‘î üzere isbât etmeğin mûcebiyle meblağ-ı mezkûr üç yüz doksan guruşu müdde‘î-i mezbûr Azarya zimmîye edâ ve teslîme merkūm Mıgırdıç zimmîye tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 23 Zilhicce sene 1162