Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 453 Hüküm no: 601 Orijinal metin no: [77b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dolapçıbaşı Usta İbrahim’in, Camcı Hacı Süleyman’dan aldığı borca ödediği faizin geri verilmesi talebiyle açtığı davada sulh oldukları Ma‘rûz Sahib-i arzuhâl Dolabcıbaşı Usta İbrahim hâssa bostânîlerinden Ali Haseki mübâşeretiyle meclis-i şer‘a ihzâr ettirdiği Camcı el-Hâc Süleyman muvâcehesinde bundan akdem mezbûr el-Hâc Süleyman’a yedinden istikrâz ve kabz eylediğim yüz on üç guruş deynim için bilâ-devr-i şer‘î altmış guruş murâbaha vermişidim meblağ-ı mezkûru mezbûr el-Hâc Süleyman’dan taleb ederim deyü tesâddî eylediği da‘vâsından bâ-tavassut-ı muslihîn mezbûr el-Hâc Süleyman ile on guruş bedel-i makbûza sulh olup mâ‘adâ elli guruşa müte‘allika âmme-i da‘vâdan mezbûr el-Hâc Süleyman’ın zimmetini ibrâ ve ıskāt ettikde ol dahi bedel-i sulh olan meblağ-ı mezbûr on guruşa müte‘allika âmme-i da‘vâdan müdde‘î-i merkūm Usta İbrahim’in zimmetini ibrâ eyleyip bu vechile kat‘-ı nizâ‘ eyledikleri Mahkeme-i Bâb’dan huzûr-ı âlîlerine i‘lâm olundu. Fî 25 Safer sene 1163