Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 453 Hüküm no: 602 Orijinal metin no: [77b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tuzcu esnafının nizama aykırı hareket ve tavırlarından şikayetçi oldukları sâbık kethudaları Ahmed Çelebi b. Ali ve Salih’in bir daha esnafı rahatsız etmeme taahhüdünde bulunmalarıyla sulh oldukları Bâ-mühr-i hazret-i efendi Ma‘rûz İstanbul’da vâki‘ tuzcu esnâfının kethudâları el-Hâc Osman ve Emin Mehmed Çelebi ve es-Seyyid Ömer Çelebi ve es-Seyyid el-Hâc Mehmed Çelebi ve Halil Beşe ve Ömer Yazıcı ve Hasan Çelebi ve Ali Çelebi ve diğer Hasan ve Mehmed Çelebi ve sâir cerîdede mazbûtü’l-esâmî yir[mi] neferden mütecâviz kimesneler meclis-i şer‘de sâbıkā kethudâları olan Ahmed Çelebi b. Ali ve es-Seyyid Salih muvâcehelerinde bundan akdem mezbûr Ahmed Çelebi kethudâmız olduğu hâlde esnâfımızdan bazılarını tecrîm ve tagrîr ve lisânıyla tekdîr ve ta‘cîz edip evzâ‘ ve etvârından cümlemiz râzı ve hoşnûd olmadığımızdan mezbûru azl ettirdip yerine cümlemizin muhtârı olan işbu el-Hâc Osman’ı nasb ettirdik lâkin mezbûr Ahmed Çelebi yine esnâfımızdan işbu es-Seyyid Salih ile yek-dil olup ihtilâl-i nizâm-ı kadîmimizi mûceb harekâta tesâddî ve bazılarımıza şetm-i galîz ve herbirimize bî-vech ziyân-dırâzlık ile cümlemizi tekdîr ve rencîde edip mezbûrânın akvâl ve ef‘âllerinden bir vechile rahatımız yokdur deyü muvâcehelerinde teşekkî eylediklerinde fîmâ-ba‘d kendi hâllerinde ırzlarıyla mukayyed ve kâr u kisbleriyle meşgūl olup kat‘a kimesneye hilâf-ı şer‘-i şerîf itâle-i lisân etmeyip tekdîr ve ta‘cîz ve rızâları olmadıkca esnâfları umûruna ve nizâmlarına asla karışmamaları’çün kıbel-i şer‘den mezbûr Ahmed Çelebi’ye ve es-Seyyid Salih’e tenbîh-i ekîd olundukda onlar dahi ba‘de’l-yevm tenbîh-i mezkûr mûcebince amel ve hareket etmek üzere herbiri ta‘ahhüd eylediği ba‘de’t-tescîl bu vechile kat‘-ı nizâ‘ eyledikleri huzûr-ı âlîlerine i‘lâm olundu bâkī fermân hazret-i veliyyü’l-emrindir. Fî 25 Safer sene 1163