Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 454 Hüküm no: 603 Orijinal metin no: [77b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Hüseyin’in, Hüseyin b. Eyüb’den satın aldığı Hafize’nin hür olduğunu ispat ettiğinden cariye bedeli olarak ödediği paranın İbrahim’e iadesi için Hüseyin’e yapılan tenbih Bâ-mühr-i hazret-i efendi Ma‘rûz Sahib-i arzuhâl İbrahim b. Hüseyin dîvân-ı âlîlerinde ma‘kūd meclis-i şer‘de Hüseyin b. Eyüb ile terâfu‘larında işbu mezbûr Hüseyin bundan akdem bin yüz altmış bir senesi Zilhicce’sinin yedinci günü gāibe ani’l-meclis uzun boylu açık kaşlı kara gözlü Hafize nâm avratı benden Gürciyyetü’l-asl câriye-i memlûkesi olmak üzere iki yüz elli guruş semen-i makbûza bana bey‘ ve teslîm ve bana ber-minvâl-i muharrer bey‘ini ve kabz-ı semen eylediğini huzûr-ı Müslimînde bi’d-defa‘ât ikrâr ve işhâd dahi edip ben dahi ba‘de’l-iştirâ ve’t-tesellüm yine gāib ani’l-meclis Mehmed Odabaşı nâm kimesneye mevsûfe-i mezbûreyi iki yüz elli sekiz guruş bir rub‘ semen-i makbûza bey‘ ve teslîm etmişidim ol dahi ba‘de’l-iştirâ ve’t-tesellüm yine gāib ani’l-meclis Ahmed Çelebi b. Mustafa nâm kimesneye üç yüz altmış altı guruş semen-i makbûza bey‘ ve teslîm edip ol dahi [78a] kezâlik ba‘de’l-iştirâ ve’t-tesellüm mevsûfe-i mezkûre Hafize bin yüz altmış iki senesi Zilhicce’sinin yirmi altıncı günü Ahî Çelebi Mahkemesi’nde nâib olan müderrisîn-i kirâmdan Ahmed Ata Efendi huzûrunda mezbûr Ahmed Çelebi ile lede’l-mürâfa‘ati’ş-şer‘iye Yedikulekapısı dâhilinde Irgād Pazarı mahallesinde sâkin es-Seyyid Mehmed nâm kimesnenin firâşından hâsıla ve zevcesi Fâtıma bt. Abdullah’dan mütevellide hürretü’l-asl olduğunu vech-i şer‘î üzere mahalle-i mezbûre ahâlîsinden Ahmed Beşe b. Osman ve Süleyman b. Mehmed ve Mehmed b. Mehmed şehâdetleriyle ba‘de’l-isbât ve’l-hükm sebîli tahliye olunmağla mezbûr Ahmed Çelebi merkūm Mehmed Odabaşı’ya semen-i mezkûr ile şer‘an mürâca‘at ol dahi kezâlik ber-nehc-i şer‘î bana mürâca‘at ve herbiri medfû‘larını istirdâd ve kabz etmeleriyle ben dahi mezbûr Hüseyin’e semen olmak üzere medfû‘um olan iki yüz elli guruşu istirdâd ederim deyü ba‘de’d-da‘vâ ve’s-suâl mezbûr Hüseyin mevsûfe-i mezkûreyi müdde‘î-i mezbûra bey‘ini ve kabz-ı semen eylediğini bi’l-külliye inkâr etmekle müdde‘î-i merkūm İbrahim müdde‘âsını lede’t-tezkiye adâlîleri [adâletleri] zâhir olan Mumcu Ömer b. Mustafa ve Süleyman b. İsmail ve Mehdîoğlu Ahmed b. Ömer nâm kimesneler şehâdetleriyle merkūm Hüseyin muvâcehesinde vech-i şer‘î üzere isbât etmeğin mûcebince meblağ-ı mezbûr iki yüz elli guruşun müdde‘î-i mezbûra tamamen edâ ve teslîmi için merkūm Hüseyin’e tenbîh-i şer‘î olunduğu huzûr-ı âlîlerine i‘lâm olundu. Fî 24 Safer sene 1163