Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 461 Hüküm no: 613 Orijinal metin no: [79a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yasef v. Benyan’ın, yanında hizmetini gördüğü Yuda v. Hayim’de hizmet bedelinden ve çeşitli eşya alacağı olduğu iddiasıyla açtığı davada tarafların sulh olup birbirlerinin zimmetlerini ibra ettikleri Ma‘rûz Sahib-i arzuhâl Yasef v. Benyan nâm Yahûdî meclis-i şer‘de derûn-ı arzuhâlde mezkûrü’l-ism Yuda v. Hayim nâm Yahûdî muvâcehesinde ben ücret ile hizmet eder makūlesinden olup beher haftada on beşer para ücret vermek kavliyle bundan akdem mesfûr Yuda Yahûdî’ye bir buçuk sene hizmet etmemle müddet-i merkūmede eylediğim hizmetimin ücretinden mesfûr Yuda Yahûdî zimmetinde olan yirmi yedi guruş hakkım ile eşyâ-i memlûkemden mecmû‘u yirmi beş guruş kıymetli yedinde kalan bir mor çuka biniş ve bir Şam alacası kaftan ve bir çuka çakşırımın aynı yedinde mevcûde ise aynını müstehleke ise ba‘de’s-sübût kıymet-i mezkûresini mezkûr Yuda Yahûdî’den taleb ederim deyü da‘vâ eylediğimde ol dahi eşyâ-i muharrereyi inkâr eylediğinden mâ‘adâ ücret-i mezkûre yirmi yedi guruşu sana tamamen def‘ ve teslîm etmişidi[m] deyü def‘e tesâddî ol vechile beynimizde münâza‘ât-ı kesîre cereyân ettikden sonra bâ-vesâtet-i muslihîn eşyâ-i mezkûreyi bana vermek üzere yine mesfûr Yuda Yahûdî ile sulh olup meblağ-ı müdde‘â-bih mezkûr yirmi yedi guruşa ve sâire müte‘allika âmme-i da‘vâdan mesfûr Yuda Yahûdî’nin zimmetini ibrâ ve ıskāt eylediğimde ol dahi kezâlik âmme-i da‘vâdan benim zimmetimi ibrâ ve ıskāt eyledi deyü olan ikrârını mesfûr Yuda Yahûdî tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî 5 Rebî‘ülevvel sene 1163