Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 462 Hüküm no: 615 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Karuk’un vefat eden Kadı Ahmed Efendi b. Mustafa’daki alacağına kefil olanlardan Şeyh Ömer Efendi b. Mehmed’e açtığı davada haklı bulunup Şeyh Ömer’in kefaletten dolayı hissesine düşen miktarı ödemesi Ma‘rûz Sarrâf tâifesinden arzuhâl eden Karuk nâm zimmî Bâb Mahkemesi’nde derûn-ı arzuhâlde mezkûrü’l-ism olup Atmaca Süleyman Çavuş kulları mübâşeretiyle meclis-i şer‘-i enverde ihzâr ettirdiği eş-Şeyh Ömer Efendi b. Mehmed mahzarında işbu mümzâ ve mahtûm bir kıt‘a deyn temessüğü nâtık olduğu üzere Anadolu kuzâtından Ma‘arrütü’n-nu‘mân kazâsına muvakkaten kādı iken bundan akdem Şu‘ûr kasabasında vefât eden Ahmed Efendi b. Mustafa b. Abdullah’ın zimmetinde cihet-i karzdan olan üç yüz yetmiş iki guruş hakkıma mezbûr eş-Şeyh Ömer efendi ile gāibân ani’l-meclis el-Hâc İsmail Efendi ve Molla İbrahim kefâlet-i sahîha-i şer‘iye ile kefîl bi’l-mâl olduklarından sonra meblağ-ı mezkûrun altmış yedi guruşunu li-ecli’l-kefâleti’l-mezkûre bana edâ ve teslîm edip üç yüz beş guruş hakkım bâkī kalmağla meblağ-ı bâkī-i mezkûrdan kefâlet-i merkūmesine binâen mezbûr eş-Şeyh Ömer Efendi’nin hissesine isâbet eden yüz guruş seksen akçeyi taleb ederim deyü ba‘de’d-da‘vâ ve’l-istintâk mezbûr eş-Şeyh Ömer Efendi cevâbında fi’l-hakīka müdde‘î-i mesfûrun takrîr-i müdde‘âsı üzere kefîl olduğunu ikrâr ve i‘tirâf etmeğin mûcebiyle ba‘de’l-hükm meblağ-ı bâkī-i mezbûr üç yüz beş guruşdan mezbûr eş-Şeyh Ömer Efendi’nin kefâlet-i mezkûresine binâen hissesine isâbet eden yüz bir guruş seksen akçeyi sarrâf müdde‘î-i mesfûr Karuk zimmîye bi-hükmi’l-kefâle edâ ve teslîme mezbûr eş-Şeyh Ömer Efendi’ye tenbîh olunduğu mübâşir-i merkūm ile huzûr-ı âlîlerine i‘lâm olundu el-emrü li-men-lehu’l-emr. Fî 5 Rebî‘ülevvel sene 1163