Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 463 Hüküm no: 616 Orijinal metin no: [79b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanım bt. Yeknazar’ın kendisini dövüp çocuğunu düşürmesine sebep olduğu iddiasıyla Lorence v. Dimitri’ye açtığı davada daha önce davanın görülmüş olduğundan davanın reddedildiği Bâ-mühr-i hazret-i efendi Ma‘rûz İstanbul’da Eskiodalar başında Çukurçeşme kurbünde İsmail Ağa odalarında sâkine şahsı ta‘rîf-i şer‘î ile mu‘arrefe olan sahibe-i arzuhâl Hanım bt. Yeknazar nâm Nasrâniye dîvân-ı âlîde ma‘kūd meclis-i şer‘de zevci Sarı Serkiz v. Avanis zimmî hazır olduğu hâlde zikrolunan [odaların] odabaşısı olup derûn-ı arzuhâlde mastûr Lorence v. Dimitri zimmî muvâcehesinde mesfûr Lo[re]nce zimmî bin yüz elli senesi Zilka‘de’sinin on üçüncü günü zikrolunan İsmail Ağa odalarında mesfûr Lo[re]nce zimmî bi-gayr-ı hakkın depme ile beni darb edip darb-ı mezkûrdan nâşî müstebînü’l-hilka bir cenîn-i meyyit ilkā etmemle mûceb-i şer‘îsini taleb ederim deyü ba‘de’d-da‘vâ ve’s-suâl mesfûr Lorence zimmî cevâbında ber-vech-i muharrer darbını inkâr eylediğinden mâ‘adâ târih-i mezkûrdan on üç gün mürûrunda müdde‘iye-i mezbûre Hanım tarafından hâzır-ı mezbûr Sarı Serkiz zimmî vekâletini ba‘de’l-isbât ber-vech-i meşrûh darb da‘vâsını mahmiye-i İstanbul’da Mahkeme-i Bâb’da hilâfeten müvellâ olan müderrisîn-i kirâmdan Abdülbaki Efendi huzûrunda meclis-i şer‘de benden bi’l-vekâle ba‘de’d-da‘vâ bâ-vesâtet-i muslihîn ber-vech-i muharrer da‘vâ-yı mezkûresinden meccânen fâriğ olup husûs-ı mezkûra müte‘allika âmme-i da‘vâdan bi’l-vekâle benim zimmetimi ibrâ ve ıskāt eyledi deyü takrîr-i meşrûhuna mutâbık mevlânâ-yı mûmâ-ileyhin imzâsıyla mümzât ve hâtemi ile mahtûm bir kıt‘a hüccet-i şer‘iye ile ve bir i‘lâm ibrâzıyla ba‘de’d-def‘ ve’l-istintâk müdde‘iye-i mezbûre Hanım Nasrâniye mesfûr Lorence zimmînin def‘-i meşrûhunu mukırre ve mu‘terife olmağla mûcebince müdde‘iye-i mezbûre Hanım Nasrâniye bî-vech mu‘ârazadan men‘ olunduğu huzûr-ı âlîlerine i‘lâm olundu el-emrü li-men-lehu’l-emr. Fî 5 min-şehri Rebî‘ülevvel sene 1163