Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 464 Hüküm no: 617 Orijinal metin no: [79b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatrine bt. Tanaş’ın geçinemedikleri kocası Bakkal Kostantin v. Eflatun’dan muhâlaa yoluyla boşandığı Ma‘rûz Şahsı ta‘rîf-i şer‘î ile mu‘arrefe olan sahibe-i arzuhâl Hatrine bt. Tanaş nâm Nasrâniye meclis-i şer‘-i enverde bakkāl tâifesinden olup derûn-ı arzuhâlde ismi mezkûr zevc-i dâhili Kostantin v. Eflatun nâm zimmî muvâcehesinde zevcim mesfûr Kostantin zimmî ile beynimizde münâferet vâkı‘a olmağla malımdan kendiye medfû‘um olup istihlâk eylediği mecmû‘u yüz beş guruş kıymetli bir çift on üç miskāl altın bilezik ve bir çift zümrüd küpe ve iki sîm kuşak ile malımdan kendiye hâlâ medfû‘um olan yirmi guruş bedel-i hul‘ olup ve mesfûrun firâşından hâsıllar ve benden mütevellidler olup bi-hakkı’l-hıdâne hacr u terbiyemde olan sadrî sagīr oğlum Hristo ve sadriye sagīre kızım Ezmirağda’yı hakk-ı hıdâneleri sukūtuna değin kendi malımdan infâk ve iksâ eyleyip kable itmâmi’l-müddeti sagīrân-ı mersûmân hâlik olurlar ise nafaka-i bâkıyye mutâlebesinden zimmetim berî olmak üzere zevcim mesfûr Kostantin zimmî ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezkûru kabûl eyledikden sonra hukūk-ı zevciyete ve târih-i i‘lâma gelince sâire müte‘allika âmme-i de‘âvî ve kâffe-i mutâlebât ve eymân ve muhâsamâtdan ben zevcim mesfûr[un] zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i de‘âvî ve kâffe-i mutâlebât ve eymân ve muhâsamâtdan benim zimmetimi ibrâ ve ıskāt eyleyip herbirimiz vech-i muharrer üzere âharın ibrâsını kabûl eyledik deyü olan ikrârını zevc-i muhâlı‘ı mesfûr Kostantin zimmî dahi tasdîk eylediği Bâb’dan huzûr-ı âlîlerine i‘lâm olundu. Fî 8 Ra sene 1163