Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 464 Hüküm no: 618 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hizmetçi Mehmed’in yanında çalıştığı Haffaf Mustafa Beşe’de çeşitli eşya ve hizmet bedelinden alacak iddiasıyla açtığı davayı ispat edemediği Ma‘rûz Sahib-i arzuhâl Mehmed meclis-i şer‘de derûn-ı arzuhâlde mezkûrü’l-ism Haffâf Mustafa Beşe mahzarında ücret ile hizmet eder makūlesinden olmamla bundan akdem mezbûr Mustafa Beşe’ye talebiyle beher şehr üçer guruş ücret kavliyle otuz ay hizmet etmişidim hâlâ müddet-i mezkûrede müctemi‘ olan doksan guruş ücretim ile eşyâ-i memlûkemden bir çuka biniş ve bir yelek ve bir Zağra kebesi ve bir ipekli kuşak ve bir Tire alacası anteri ve bir üzerliğim mezbûr Mustafa Beşe yedinde kalmağla meblağ-ı mezkûr ile eşyâ-i muharrere-i mezkûremi mezbûr Mustafa Beşe’den taleb ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsını beyâna kādir olmayıp talebiyle mezbûr Mustafa Beşe’ye vech-i şer‘î üzere yemîn verilmeğin mûcebince müdde‘î-i mezbûr Mehmed bilâ-beyyine bî-vech mu‘ârazadan men‘ olundu Mahkeme-i Bâb’dan huzûr-ı âlîlerine i‘lâm olundu. Fî 8 Rebî‘ülevvel sene 1163